امریکہ میں سڑک حادثہ کی شکار خاتون کوما میں، ویزہ کے لیے بھٹک رہے رشتہ دار، سپریا سولے نے جئے شنکر سے تعاون کا مطالبہ کیا

 امریکہ میں سڑک حادثہ کی شکار خاتون کوما میں، ویزہ کے لیے بھٹک رہے رشتہ دار، سپریا سولے نے جئے شنکر سے تعاون کا مطالبہ کیا 

امریکہ میں اس مہینے سڑک حادثہ کا شکار ہوئی ہندوستانی خاتون اب کوما میں چلی گئی ہے۔ مہاراشٹر میں اس کے اہل خانہ اس سے ملنے کے لیے ویزہ کو لے کر مرکز سے مسلسل مدد کی گہار لگا رہے ہیں۔ نیلم شندے کے والد تاناجی شندے نے اس معاملے میں کہا، "ہمیں 16 فروری کو حادثہ کے بارے میں پتہ چلا اور تب سے ہم ویزہ کے لیے کوشش کر رہے ہیں لیکن ہمیں ابھی تک ویزہ نہیں ملا ہے۔"

ذرائع ابلاغ کے نمائندوں سے بات چیت کرتے ہوئے نیلم شندے کے چچا نے کہا کہ اہل خانہ فوری طور پر ویزہ حاصل کرنے کے لیے پاسپورٹ دفتر گئے اور مرکزی وزیر مرلی دھر موہول، سابق رکن پارلیمنٹ شری نواس پاٹل اور سابق وزیر بالا صاحب پاٹل (دونوں ستارا) سے بھی رابطہ حاصل کیا لیکن ابھی تک اس معاملے میں کوئی حل نہیں نکل سکا ہے۔

ادھر این سی پی (ایس پی) ایم پی سپریا سولے نے شندے کے والد کو ویزہ دلانے کے لیے وزیر خارجہ ایس جئے شنکر سے مدد مانگی ہے۔ انہوں نے کہا یہ ایک تشویشناک معاملہ ہے اور ہم سبھی کو مل کر اسے سلجھانے میں مدد کرنی چاہیے۔ سولے نے کہا، "میں رشتے داروں  سے بات کر رہی ہوں اور انہیں یقین دلا رہی ہوں کہ معاملہ سلجھ جائے گا۔"

واضح رہے کہ 14 فروری کو کیلیفورنیا میں ایک کار نے ہندوستان کے ستارا کی ساکنہ 35 سالہ نیلم شندے کو ٹکر مار دی تھی جس کے بعد سے ان کی حالت تشویشناک ہے۔ ان کے سینے اور سر میں فریکچر اور چوٹیں آئی ہیں۔ وہ ابھی آئی سی یو میں ہے۔ ان کے اہل خانہ کو حادثہ کے دو دن بعد پتہ چلا۔ ان کے مطابق اسپتال نے ان کے دماغ کے آپریشن کی اجازت طلب کی تھی.