پٹنہ گاندھی میدان بم دھماکہ معاملہ: پھانسی کی تصدیق اور ملزمین کی اپیلوں پر ہائی کورٹ سماعت کرنے کے لئے تیار
7/ مئی سے بحث شروع کئے جانے کا حکم، جمعیۃ علماء سینئر وکلاء کی خدمات حاصل کریگی
پٹنہ 3/ اپریل : بہارکی راجدھانی پٹنہ کے مشہور گاندھی میدان میں رونما ہونے والے بم دھماکہ معاملے میں نچلی عدالت سے پھانسی کی سزا پانے والے چارملزمین کی پھانسی کی تصدیق کیئے جانے کے تعلق سے پٹنہ ہائی کورٹ میں داخل پٹیشن پر عدالت نے سماعت کرتے ہوئے حتمی سماعت مئی کے مہینہ میں کئے جانے کا حکم جاری کیا، دو رکنی بینچ نے ملزمین کی جانب سے نچلی عدالت کے فیصلہ کو چیلنج کرنے والی عرضداشتوں پر بھی سماعت کیئے جانے کا حکم جاری کیا، عدالت نے ملزمین کی جانب سے داخل اپیل کو سماعت کے لئے قبول کرلیا اور نچلی عدالت کا ریکارڈیعنی کے پیپر بک ملزمین کو مہیا کرانے کا حکم جاری کیا۔
پٹنہ ہائی کورٹ کے دو رکنی بینچ کے جسٹس اشتوش کمار اور جسٹس خاتم ریزاکے روبرو گذشتہ کل سماعت عمل میں آئی جس کے دوران عدالت نے فریقین کے وکلاء کو حکم دیا کہ وہ حتمی سماعت کے لیئے تیار رہیں، 7/مئی سے عدالت یومیہ کی بنیاد پر تمام اپیلوں پر سماعت کریگی، کسی بھی فریق کو وقت طلب کرنے کا موقع نہیں دیا جائے گا ایسا عدالت نے زبانی تبصرہ کیا۔واضح رہے کہ خصوصی عدالت نے ملزمین حیدر علی عالم انصاری، مجیب اللہ جابر انصاری، نعمان سلطان انصاری اور امتیاز انصاری کمال الدین کو پھانسی کی سزا سنائی جبکہ ملزمین عمیر شفیع صدیقی اوراظہر الدین شکیل الدین قریشی کو عمر قید کی سزا سنائی تھی، عدالت نے افتخار احمد کو سات سال اور احمد حسین اور محمد فیروز عالم کو دس سال کی سزا سنائی تھی۔ پھانسی کی سزا اور عمر قید کی سزا والے ملزمین جیل میں ہے بقیہ ملزمین کی جیل سے رہائی ہوچکی ہے۔
پھانسی کی سزا اور عمر قید کی سز ا پانے والے ملزمین کی جانب سے ہائیکورٹ میں جمعیۃ علماء مہاراشٹر (ارشد مدنی) قانونی امداد کمیٹی کی جانب سے اپیل داخل کی گئی ہے نیز ان اپیلوں پر بحث کرنے کے لیئے جلد ہی سینئر وکلاء کی تقرری کیجائے گی۔
عدالت میں ملزمین کی جانب سے ایڈوکیٹ واصف رحمن خان، ایڈوکیٹ شاداب اختر اور ایڈوکیٹ سنتوش کمار یادو موجود تھے جبکہ استغاثہ کی نمائندگی کے این سنگھ (اے ایس جی)منوج کما ر سنگھ(اسپیشل پبلک پراسیکیوٹر این آئی اے) اور انکیت کمار سنگھ موجود تھے۔
عیاں رہے کہ 23/ اکتوبر2013ء کو پٹنہ کے مشہور تاریخی گاندھی میدان میں بم دھماکہ ہوا تھا جب وزیر اعظم نریندر مودی ایک عوامی ریلی سے خطاب کرنے والے تھے،اس بم دھماکہ میں 6/لوگ ہلاک اور 90/ افراد زخمی ہوئے تھے۔ بم دھماکوں کی تفتیش قومی تفتیشی ایجنسی NIA کے سپرد کی گئی جس نے بہار، جھاکھنڈ اور آس پاس کی دیگر ریاستوں سے10/ مسلم نوجوانوں کو گرفتار کیا تھا اور ان کے خلاف تعزیرات ہند کی دفعات 307,326,212,121(A), 120(B), 34، دھماکہ خیز مادہ کے قانون کی دفعات 3, 5 اور غیر قانونی سرگرمیوں کی روک تھام والے قانون کی دفعات 16,18,20 کے تحت مقدمہ قائم کیا تھا۔
کوئی تبصرے نہیں:
ایک تبصرہ شائع کریں