ممبئی میں 8 سے 11 نومبر تک بارش ہوگی۔ پونے، ستارا اور سانگلی میں برسیں گے بادل : محکمۂ موسمیات کی پیشن گوئی
ممبئی: تامل ناڈو، کیرالہ سمیت کئی علاقوں میں بارش ہو رہی ہے۔ دریں اثناء، موسمی ماہرین نے ممبئی اور ارد گرد کے علاقوں میں 8 نومبر سے 11 نومبر کے درمیان بارش کا امکان ظاہر کیا ہے۔ اگر بارش ہوتی ہے تو ممبئی والوں کو آلودگی سے راحت مل سکتی ہے۔ بارش کی وجہ سے فضا میں موجود ذرات ٹھکانے لگیں گے جس سے ہوا کا معیار بھی بہتر ہوگا۔ ممبئی میں آلودگی کی حالت ایسی ہے کہ لوگوں کے لیے سانس لینا مشکل ہو گیا ہے۔ اے کیو ائی کی حالت نازک ہے۔ کئی علاقوں میں صبح سے شام تک دھند کی چادر چھائی ہوئی ہے۔ ہائی کورٹ نے ممبئی میں آلودگی کے معاملے کا بھی نوٹس لیا ہے اور افسران کی سرزنش کی ہے۔ دیوالی پر آتش بازی کے حوالے سے بھی رولز جاری کیے جائیں گے۔ ممبئی میں تعمیراتی کاموں کی نگرانی جاری ہیں، اور کئی پر پابندی لگا دی گئی۔ اب بارش کی وجہ سے ممبئی کے لوگوں کو اس سموگ اور گردوغبار سے بڑی راحت ملے گی۔
ممبئی میں رات کا درجہ حرارت 24 ڈگری سیلسیس سے نیچے جانے کے باوجود دن کا درجہ حرارت اب بھی 35 سے 36 ڈگری کے درمیان ہے۔ پچھلے 20 دنوں کے اعداد و شمار سے پتہ چلتا ہے کہ ممبئی کے مضافاتی علاقے میں زیادہ سے زیادہ درجہ حرارت 36 ڈگری سیلسیس پر برقرار ہے۔
پیر کو زیادہ سے زیادہ درجہ حرارت میں معمولی کمی ریکارڈ کی گئی ہے۔ علاقائی محکمۂ موسمیات سے موصولہ اعداد و شمار کے مطابق مضافاتی علاقے میں زیادہ سے زیادہ درجہ حرارت 34.5 ڈگری اور کم سے کم 22.8 ڈگری سیلسیس ریکارڈ کیا گیا ہے۔ جبکہ شہر کا زیادہ سے زیادہ درجہ حرارت 34.6 ڈگری اور کم سے کم 25.5 ڈگری سیلسیس ریکارڈ کیا گیا ہے۔ ایسے میں اگر بارش ہوتی ہے تو کچھ راحت ملنے کے امکانات ہیں۔
ماہر موسمیات راجیش کپاڈیہ نے کہا کہ بحیرہ عرب میں کم دباؤ کا علاقہ بن رہا ہے۔ یہ 8 نومبر تک تیار ہو جائے گا۔ جس کی وجہ سے ممبئی کے کچھ علاقوں میں 5 سے 8 ملی میٹر بارش کا امکان ہے۔ اگر بارش ہوتی ہے تو ممبئی کی ہوا کا معیار بھی بہتر ہو جائے گا۔ موسم کی پیشین گوئی کرنے والی تنظیم اسکائی میٹ کے چیف میٹرولوجسٹ مہیش پلووت نے کہا کہ ممبئی میں بارش کے 50-50 امکانات ہیں۔ پونے، ستارا، سانگلی میں بارش ہوگی۔ ممبئی میں آسمان ابر آلود رہے گا جس کی وجہ سے ہوا میں نمی رہے گی۔
کوئی تبصرے نہیں:
ایک تبصرہ شائع کریں