جمعیت علماء جالنہ کے زیر اہتمام پندرہ روزہ سیرت پاک کی مہم کا انعقاد
(سیرت پاک کے ساتھ ختم نبوت، نسل نو کی بے راہ روی اور فکری تہذیبی ارتداد اسباب اور حل کو موضوع بناکر مسلم معاشرے میں بیداری کی تحریک چلائی جائے گی)
جالنہ 11؍ستمبر: پیغمبر اسلام حضرت محمد مصطفیٰ صلی اللہ علیہ وسلم اس دنیا میں رحمت للعالمین بن کر تشریف لائے،آپ کا حیات آفریں پیغام، آپ کی صاف و شفاف سیرت، آپ کے اخلاق و کردار، آپ کا خوبصورت اسوہ، اور آپ کی گراں بہا تعلیمات، جس کے دور رس عملی نتائج، اور فوائد و ثمرات پر تاریخ انسانی شاہد و گواہ ہے، صرف مسلمانوں کے لئے نہیں ہیں بلکہ ساری دنیا کے انسانوں کے لئے ہیں، لیکن افسوس کہ عصر حاضر میں دنیا کی اسی فیصد انسانی آبادی اس سراپا رحمت ذات و صفات اور آپ کی روشن تعلیمات سے یکسر نا آشنا ہے، بلکہ غلط فہمیوں کا شکار ہے،لہذا امت مسلمہ کی ذمہ داری اور آپﷺ سے محبت و تعلق کا تقاضا ہے کہ وہ دنیائے انسانیت کے سامنے رسول اللہ صل اللہ علیہ وسلم کی ذات و صفات، پیام و پیغام، سیرت و أخلاق اور تعلیمات کا اپنے قول و عمل سے صحیح تعارف پیش کرے، غلط فہمیوں کا ازالہ کرے، اور بتائے کہ حضرت محمد رسول اللہ صل اللہ علیہ وسلم آپ کے سب سے بڑے محسن اور سراپا رحمت و شفقت ہیں، وہ آپ کے لئے بھی تشریف لائے تھے، ان کا پیغام و پیام ساری انسانیت کے لئے بھی ہے، اسی مقصد کو سامنے رکھتے ہوئے جمعیت علماء ارشد مدنی ضلع جالنہ ہر سال ماہ ربیع الاول میں سیرتِ سرورِ کائنات صلی اللہ علیہ وسلم کے ضمن میں پورے ضلع میں پروگرامس منعقد کرتی ہے۔
مولانا سید نصراللہ حسینی سہیل ندوی صدر جمعیت علماء ضلع جالنہ نے اس کی تفصیل بتاتے ہوئے کہا کہ جمعیت علماء کے ارکان عاملہ نے طئے کیا ہے کہ ربیع الاول میں جہاں سیرت کے موضوع پر گفتگو ہو وہیں اس کے ساتھ ختم نبوت، نسل نو کی بے راہ روی، فکری و تہذیبی ارتداد اسباب اور حل کے عنوانات پر خصوصی طور بیانات ہوں اسی پیغام کو سامنے رکھتے ہوئے سیرت پاک کے ساتھ ان عنوانات کو بھی اس مہم کا موضوع بنایا جائے گا۔
ربیع الأول کے ابتدائی پندرہ دنوں میں شہر جالنہ و اطراف کے اسکول، کالج، کے طلباء وطالبات کے درمیان، مکاتب قرآنیہ کے طلباء وطالبات اور مختلف محلوں کی خواتین میں اور کسی ایک جمعہ کوشہر کی مختلف مساجد میں یہ پروگرام منعقد ہوں گے نیز مزید یہ کوشش کی جارہی ہے کہ ہمارے ہندو بھائیوں کے درمیان بھی حضور صلی اللہ علیہ وسلّم کی پرکشش شخصیت اور ان کی سیرت کے مختلف گوشوں کو رکھا جائے تاکہ وہ بھی رحمت عالم صلی اللہ علیہ وسلم کی ذات اقدس سے صحیح طور واقف ہوں اور ان کی اہم پاکیزہ تعلیمات سے روشناس ہوں،ان پروگراموں میں ضلع جالنہ و مرہٹواڑہ کے اکابر علماء کرام سے استفادہ کیا جائے گا،اخیر میں ملک کے کسی مقتدر عالم دین کو مدعو کرکے عظیم الشان سیرت النبی صلعم پر اجلاس عام منعقد ہوگا،تمام محبین رسول صلی اللہ علیہ وسلم سے درخواست ہے کہ اپنا اسلامی فریضہ سمجھتے ہوئے اس پاک مہم کو کامیاب بنانے میں جمعیت علماء ارشد مدنی ضلع جالنہ کا ہر طریقہ سےتعاون فرمائیں اور اسے کامیابی سے ہم کنار کریں۔
اس طرح کی گذارش جمعیت علماء کے ارکان عاملہ مولانا سید نصراللہ حسینی سہیل ندوی صدر جمعیت علماء، مولانا عیسیٰ خان کاشفی صدر جمعیت علماء شہر جالنہ، محمد ایوب خان جنرل سیکرٹری جمعیت علماء ضلع جالنہ، محمد افتخار الدین نائب صدر جمعیت علماء، مولانا محمد حنیف مفتاحی نائب صدر جمعیت، محمد قاسم اعجاز صدیقی سیکرٹری جمعیت علماء،مولانا عبد العلیم اشاعتی، مولانا سید احسان حسینی ندوی، محمد احتشام الدین باغبان، حافظ عبد السلام قریشی، مولانا عبد اللہ سراجی، بابو بھائی، شیخ طیب، حاجی سید حبیب،ڈاکٹر جمعہ خان، ایڈوکیٹ اشفاق احمد کاغذی، حاجی محمد سلیم باوا، مفتی سید نعمان ندوی، ایڈوکیٹ خرم، مولانا محمد عمران خان ندوی صدر جمعیت علماء تعلقہ بھوکردن، الحاج محمد داؤد صدر جمعیت علماء تعلقہ جعفر آباد، حافظ محمد شباب باغبان صدر جمعیت علماء ارشد مدنی تعلقہ منٹھا، حافظ محمد اسد اللہ صدر جمعیت علماء رنجنی، مفتی سید عذیر ندوی حاجی ناصر خان و دیگر اراکین عاملہ نے کی ہے،
کوئی تبصرے نہیں:
ایک تبصرہ شائع کریں