🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳
شہریان کو 76ویں جشن آزادی کی پر خلوص مبارکباد
15 اگست کی تقریبات میں اسلاف کی قربانیوں پر روشنی ضرور ڈالیں: اعجاز بیگ
مالیگاوں شہر کانگریس پارٹی کے ضلعی صدر اعجاز بیگ نے کہا کہ ہمارے ملک کے اندر آزادی کی 76ویں سالگرہ منائی جائے گی، تو ہمارے لیے یہ لمحہ فکریہ بھی ہے کہ ہم محض یوم آزادی کا جشن نہ منائیں، سسٹم میں اپنی حصہ داری بھی طلب کریں۔
ہر سال 15 اگست کو ملک گیر سطح پر یوم آزادی کی تقریبات کا اہتمام کیا جاتا ہے۔ موجودہ دور میں ملک کے اندر جمہوری اقدار اور اس کے سماجی و سیاسی تانے بانے کو غیر معمولی نقصان پہنچایا گیا ہے، جس سے ملک نفرت کے ڈھیروں پر جا رہا ہے۔ ہمارا المیہ یہ ہے کہ ہم نے اپنی اور اپنے اسلاف کی خدمات کو اس طرح نہیں یاد کیا، یا کرایا، جیسا کہ ہماری ذمہ داری تھی۔ مجھے امید ہی نہیں یقین بھی ہے کہ ہم اپنے مجاہدین آزادی نیز اسلاف کی قربانیوں کے حوالے سے اپنے جلسوں میں مثبت انداز میں گفتگو کریں گے۔
ہم یوم آزادی کا جشن مناتے ہوئے اپنے حقوق کی بازیابی کے ساتھ ملک کے سسٹم میں اپنی حصہ داری بھی طلب کریں، یہ بات بالکل واضح ہے کہ مسلمان ہندوستان کی تحریک آزادی میں بہت آگے آگے رہے ہیں، مسلمانوں نے جنگ آزادی میں بھرپور حصہ لیا تھا۔ یہ بات بہت مضبوطی کے ساتھ کہنے میں کسی تامل کی ضرورت نہیں اور نئی نسل کو آزادیٗ فکر و انصاف، مساوات اور امن عامہ کی اہمیت سے آگاہ کریں۔
اعجاز بیگ نے اس دوران مدارس، اسکول اور کالج و اداروں اور ملی تنظیموں کے مقامی ذمہ داروں سے کہا کہ وہ 76ویں یوم آزادی کی تقریبات کو درج بالا نکات کو پیش نظر رکھ کر منائیں۔
🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳
کوئی تبصرے نہیں:
ایک تبصرہ شائع کریں