مجلس اتحادالمسلیمن نے آٹھ اور امیدواروں کی جاری کی دوسری فہرست

لکھنؤ، 18 جنوری : آل انڈیا مجلس اتحاد المسلمین (اے آئی ایم آئی ایم) نے اتر پردیش اسمبلی انتخابات کے لیے اپنے امیدواروں کی دوسری فہرست جاری کی۔  اس فہرست میں آٹھ امیدواروں کے نام شامل ہیں۔  اس سے قبل اتوار کو پارٹی نے نو امیدواروں کے ناموں کا اعلان کیا تھا۔  مجلس اتحاد المسلمین کے قومی صدر اور حیدرآباد کے رکن پارلیمنٹ اسد الدین اویسی اس بار اترپردیش میں اکیلے اسمبلی انتخابات لڑ رہے ہیں اور انہوں نے 100 سیٹوں پر امیدوار کھڑے کرنے کا اعلان کیا ہے۔

  مجلس اتحاد المسلمین کے ریاستی صدر شوکت علی نے امیدواروں کی دوسری فہرست جاری کی۔  پارٹی کی طرف سے جاری کردہ دوسری فہرست میں صاحبہ آباد (غازی آباد) سے پنڈت منموہن جھا عرف گاما، مظفر نگر صدر (مظفر نگر) سے انتظار انصاری، چرتھولی (مظفر نگر) سے طاہر انصاری، بھوجپور (فرخ آباد) میں طالب صدیقی، صادق علی کو جھانسی صدر (جھانسی)، روڈولی (ایودھیا) سے شیر افغان، بتھری چین پور (بریلی) سے توفیق پردھانی اور ڈاکٹر عبدالمنان کو  اتھرولا (بلرام پور) اسمبلی حلقہ سے امیدوار نامزد کیا ہے.  پارٹی نے آٹھ امیدواروں کی دوسری فہرست جاری کی ہے جس میں سات مسلم امیدواروں کو موقع دیا گیا ہے۔  اویسی نے جن سیٹوں پر مسلم امیدوار کھڑے کیے ہیں وہ سبھی اتر پردیش کے مسلم اکثریتی علاقے ہیں۔  اب تک 17 امیدواروں کے ناموں کا فیصلہ ہو چکا ہے۔

  ایم آئی ایم کے سربراہ اسد الدین اویسی کی طرف سے جاری کردہ امیدواروں کی پہلی فہرست کے مطابق ڈاکٹر مہتاب کو غازی آباد کی لونی سیٹ سے، فرقان چودھری کو ہاپوڑ کی گڑھ مکتیشور سیٹ سے اور حاجی عارف کو دھولانہ سیٹ سے امیدوار بنایا گیا ہے۔  رفعت خان میرٹھ کی سیوال کھاس سیٹ سے، ذیشان عالم سردھانا سیٹ سے اور تسلیم احمد کیتھور سیٹ سے الیکشن لڑیں گے۔  ساتھ ہی سہارنپور ضلع کی بیہٹ سیٹ سے امجد علی اور سہارنپور دیہات کی سیٹ سے مرغوب حسن امیدوار ہوں گے۔  شاہین رضا خان کو بریلی ضلع کی بریلی سیٹ سے امیدوار بنایا گیا ہے۔