جمعیۃ علماء مہاراشٹر کا شہری ترقیات کے وزیر ایکناتھ شندے کو میمورنڈم مولانا حلیم اللہ قاسمی کی قیادت میں وفد کا خطۂ کوکن کا دورہ جاری
ممبئی 1/ اگست : جمعیۃ علماء مہاراشٹر(ارشد مدنی) کے جنرل سیکریٹری مولانا حلیم اللہ قاسمی کی سربراہی میں آٹھ رکنی وفد نے آج سیلاب سے متاثرہ خطۂ کوکن کے مختلف علاقوں کا دورہ شروع کیا جس کے دوران انہوں نے شہری ترقیات کے وزیر ایکناتھ شندے کو میمورنڈم پیش کرتے ہوئے ان سے مطالبہ کیا کہ سیلاب سے متاثرین کا سروے کرکے ان کی بازآباد کاری کے لئے جلداز جلد کام شروع کیا جائے۔
وفد جس میں حافظ محمد ذاکر، مولانا اشتیاق احمد قاسمی (نائب صدور جمعیۃ علماء مہاراشٹر)، مفتی حفیظ اللہ قاسمی، مشتاق صوفی(جنرل سیکریٹری جمعیۃ علماء دھولیہ) و دیگر شامل ہیں نے شہری ترقیا ت کے وزیر ایکناتھ شندے سے ملاقات کرتے ہوئے انہیں میمورنڈم دیا اور ان سے انسانیت کے نام پر بلا تفریق مذہب و ملت سرکاری سہولیات فراہم کرنے کا مطالبہ کیا۔
وفد آج صبح دواؤں کا بڑا ذخیرہ لیکر مہاڑ سینٹر مدرسہ تعلیم الاسلام دابھول پہنچا اور مولانا عبدالمجید، مفتی اصغر علی اور دیگر مقامی جمعیۃ علماء کے احباب سے ملاقات کے بعد وفد سیلاب سے تباہ حال شہر مہاڑ کے پانساری محلہ پہنچ کر مقامی افراد سے ملاقات کی اور ان کے حالات سنے اور چند مکانات کا جائزہ بھی لیا۔
اسی درمیان وفد نے حافظ ذاکر کی سربراہی میں بیڑ سے آئی ہوئی ڈاکٹروں کی ٹیم سے ملاقات کرکے انہیں ان کے کیمپ روانہ کیا اور صوفی مشتاق (دھولیہ) کی سربراہی میں آئے ہوئے الیکٹریشین اور میکانکس کو ذمہ داری تقسیم کرکے انہیں بھی روانہ کیا گیا۔
وزیر موصوف کو میمورنڈم دینے کے بعد وفد مہاڑ کے محلہ کاکڑتلا کی طرف روانہ ہوگیا، پورے شہر کی صورت حال تباہی کا منظر پیش کررہی تھیں، گھر ہو یا راستے ہر جگہ کیچڑ ہی کیچڑ ہے جس کی وجہ سے چلنا دشوار ہے، عمارتیں خستہ حال ہیں۔
مولانا حلیم اللہ قاسمی نے کہا کہ صدر جمعیۃ علماء ہند مولانا سید ارشد مدنی کی منشا ء اور ہدات کے مطابق بہت جلد انجینئروں پر مشتمل ایک گروپ خطۂ کوکن و مغربی مہاراشٹر روانہ کیا جائے گا تاکہ سروے کرنے کے بعد مکانات کی تعمیر و مرمت اور با زآباد کاری انجام دی جاسکے۔
کوئی تبصرے نہیں:
ایک تبصرہ شائع کریں