وشو ہندو سینا کے صدر ارون پاٹھک کا نارائن رانے پر متنازعہ بیان ، سر قلم کرنے پر 51 لاکھ انعام کا اعلان
وارانسی : وشو ہندو سینا کے صدر ارون پاٹھک نے مرکزی وزیر نارائن رانے کا سر قلم کرنے پر 51 لاکھ روپے انعام کا اعلان کیا ہے ۔ پاٹھک کے بیان کے بعد اب مہاراشٹر میں دوبارہ سیاسی پارہ بڑھنے کا امکان ہے۔
وارانسی میں وزیر اعظم اور وزیر اعلیٰ کے پوسٹر چسپاں کرنے کے لیے مبینہ طور پر تین ماہ سے مفرور ارون پاٹھک نے فیس بک اور ٹوئیٹر پر مرکزی وزیر نارائن رانے کا سر قلم کرنے والے کو 51 لاکھ روپے انعام کا اعلان کیا ہے ۔ ارون پاٹھک بھیلوپور پولیس اسٹیشن میں درج کیس میں مطلوب ہے لیکن پولیس اس کا سراغ نہیں لگا پائی ہے ۔
ارون پاٹھک نے فیس بک اور ٹوئیٹر پر لکھا کہ مرکزی وزیر نارائن رانے کا سر قلم کرنے والے کو 51 لاکھ کا انعام دیا جائے گا۔ انہوں نے یہ بھی ٹوئیٹ کیا کہ نارائن رانے کی راکھ کو کاشی میں بہانے نہیں دیا جائے گا۔ انہوں نے کہا کہ بالا صاحب ہی تھے جنہوں نے نارائن رانے کو شیو سینک بنایا اور سستی شہرت حاصل کرنے کے لیے رانے نے بالا صاحب کے بیٹے پر حملہ کیا۔ دریں اثناء ، سینئر حکام نے اس واقعے پر کوئی تبصرہ نہیں کیا ہے۔
کوئی تبصرے نہیں:
ایک تبصرہ شائع کریں