26 کروڑ کے ہفتہ وصولی کیس میں انڈرورلڈ ڈان چھوٹا راجن کو دو سال کی سزا

ممبئی سیشن عدالت نے 26 کروڑ ہفتہ وصولی کیس میں انڈرورلڈ ڈان چھوٹا راجن کو دو سال کی سزا سنائی ہے ۔  عدالت نے ہفتہ وصولی کیس میں چھوٹا راجن کے ساتھ تین دیگر افراد کو بھی سزا سنائی ہے ۔ بتادیں کہ چھوٹا راجن پر پنویل کے بلڈر نندو وازیکر کو دھمکیاں دے کر 26 کروڑ کی ہفتہ وصولی کا الزام  ہے۔

 معاملہ 2015 کا ہے۔  2015 میں ، نندو وازیکر نے پونے میں ایک زمین خریدی تھی جس کے لئے ایجنٹ پرمانند ٹھکر کو 2 کروڑ روپئے کا کمیشن دینے کا فیصلہ کیا گیا تھا۔  ٹھکر کو اور زیادہ رقم چاہئے تھی لیکن وازیکر نے انکار کردیا۔  کہا جاتا ہے کہ اس کے بعد ٹھکر نے چھوٹا راجن سے رابطہ کیا تھا ۔  ٹھکر فی الحال مفرور ہے۔

 اس کے بعد چھوٹا راجن نے اپنے کچھ لوگوں کو دفتر بھیجا اور دھمکیاں دینا شروع کردیں۔  اس نے دو کروڑ کے بجائے براہ راست وازیکر سے 26 کروڑ کی رقم کا مطالبہ کیا اور وازیکر کو جان سے مارنے کی دھمکی بھی دی ۔  چھوٹا راجن نے خود بلڈر سے دو بار تاوان کے لئے فون  کیا تھا ۔ بتادیں کہ ممبئی کا یہ تیسرا کیس ہے جس میں چھوٹا راجن کو سزا سنائی گئی ہے۔  اس کے علاوہ چھوٹا راجن کو دہلی میں جعلی پاسپورٹ کیس میں بھی سزا سنائی جاچکی ہے۔