ناسک میں کار اور موٹر سائیکل تصادم میں 7 افراد کی موت, علاقے میں غم و غصے کا ماحول
ناسک (مہاراشٹر نامہ ڈیسک) ناسک ضلع میں ایک خوفناک سڑک حادثے میں 7 افراد کی موت ہو گئی جبکہ 2 دیگر شدید طور پر زخمی ہیں۔ مہلوکین میں 3 مرد اور 3 خواتین کے علاوہ 2 سال کا ایک بچہ بھی شامل ہے۔ پولیس کے مطابق بدھ کی دیر رات ڈنڈوری قصبے کے قریب کار اور موٹرسائیکل میں زبردست تصادم ہوگیا۔ جس میں 7 جانوں کا اتلاف ہوا.
ایک پولیس افسر کے مطابق رات 11.57 بجے وانی-ڈنڈوری روڈ پر ایک نرسری کے پاس سڑک حادثہ کی اطلاع ملی تھی۔ جب پولیس موقع پر پہنچی تو دونوں گاڑیاں سڑک کنارے ایک چھوٹی نہر میں گری ہوئی تھیں۔ پولیس نے بتایا کہ حادثے میں 7 افراد کی موت ہو گئی۔ اس کے بعد پولیس ٹیم اور دیگر ایجنسیوں کے ذریعہ راحت و بچاؤ مہم شروع کی گئی۔
دونوں گاڑیوں کو نہر سے نکالنے کے ساتھ ہی لاشوں کو پوسٹ مارٹم کے لیے بھیجا گیا۔ زخمیوں کو سنگین حالت میں قریب کے اسپتال میں داخل کرایا گیا۔ ایس پی نے بتایا کہ حادثے کی وجوہات کی جانچ کی جا رہی ہے اور واقعہ سے جڑے سبھی تکنیکی پہلوؤں پر بھی نظر رکھی جا رہی ہے۔
مہلوکین کی شناخت دیوی داس پنڈت گانگرڈے (28), منیشا دیو داس گانگرڈے (23), اتم ایکناتھ جادھو (42), الکا اتم جادھو (38), دتاتریہ واگھمارے (45), انوسیا دتاتریہ واگھمارے (40) اور بھاویش دیوی داس گانگرڈے (2) کے طور پر ہوئی ہے۔
اس اندوہناک حادثے کے بعد پورے علاقے میں غم و غصے کا ماحول پایا جارہا ہے۔ بتایا جاتا ہے کہ اس سڑک پر پہلے بھی کئی حادثات ہو چکے ہیں، جس سے مقامی لوگوں نے انتظامیہ سے یہاں ٹریفک کنٹرول اور سڑک تحفظ سے متعلق اقدامات کرنے کا مطالبہ کیا ہے۔۔
کوئی تبصرے نہیں:
ایک تبصرہ شائع کریں