مہاراشٹر نامہ

 

تھانے پولیس نے کیا موبائل فون چھیننے والے بین الاقوامی گینگ کا پردہ فاش، چوری شدہ فون نیپال بھیجے جاتے تھے۔

تھانے: تھانے پولیس نے نیپال سے منسلک فون چھیننے میں ملوث ایک گروہ کا پردہ فاش کیا۔ پولیس نے اس معاملے میں دو افراد کو گرفتار کیا ہے۔ پہلی گرفتاری رواں سال 22 اپریل کو ہوئی تھی جبکہ دوسری گرفتاری 10 اگست کو ہوئی ۔ دوسرے ملزم کو پولیس نے ماجی واڑہ ، تھانے سے گرفتار کیا ہے۔ وہ چار ماہ سے گرفتاری سے بچ رہا تھا۔

پولیس کے مطابق دونوں پر شہر بھر میں 5.4 لاکھ روپے مالیت کے 24 موبائل فون چوری کرنے کا الزام ہے۔ حکام کے مطابق دوسرے ملزم اظہر الدین معین الدین مومن نے چھ جرائم میں ملوث ہونے کا اعتراف کر لیا ہے۔ اس دوران اس نے بتایا کہ چوری کیے گئے تمام فون ممبئی اور مدھیہ پردیش کے راستے نیپال بھیجے گئے تھے۔

پولیس اب تک ملزمان سے 5.4 لاکھ روپے مالیت کے 24 مسروقہ موبائل فون برآمد کر چکی ہے۔ حکام نے بتایا کہ پولیس اس کیس سے جڑے دیگر لنکس اور موبائل چھیننے کے ریکیٹ میں ملوث دیگر ملزمان کی تحقیقات کر رہی ہے۔