امتیاز جلیل نے عبدالمالک کی عیادت کی
یہ زمین جائیداد کا تنازعہ نہیں سیاسی رقابت کا معاملہ ہے: امتیاز جلیل
ناسک 30 مٸی ۔ صدر کل ھند مجلس اتحادالمسلمین مہاراشٹر و رکن پارلمنٹ اورنگ آباد نے آج ناسک کے اپولو ہاسپٹل پہنچ کر مالیگاؤں کے سابق میئر و ضلعی صدر مجلس اتحادالمسلمین الحاج عبدالمالک کی عیادت کی اور ان سے تفصیلی بات چیت کی ۔ اور ساتھ ہی اپولو ہاسپٹل کے سی ای او سے مل کر عبدالمالک میئر کی صحت و معالجے سے متعلق تفصیل حاصل کی ۔ صحافیوں سے بات چیت کے دوران انہوں نے بتایا کہ شمالی مہاراشٹر اور مالیگاؤں میں ڈاکٹر خالد پرویز اور عبدالمالک کی بدولت مجلس اتحادالمسلمین مضبوط ہوئی ہے اور آج مجلس کے دو ایم ایل اے ہیں ۔ یہی بات مخالفین مجلس کو برداشت نہیں ہورہی اور عبدالمالک پر جان لیوا حملہ اسی کی غمازی کرتا ہے ۔ اور تین گولیاں لگنے سے ظاہر ہوتا ہے کہ عبدالمالک کو جان سے مارنے کی مکمل پلاننگ تھی تاکہ ایک بھائی کو مار کر دوسرے بھائی کے حوصلوں کو توڑا جاسکے ۔ ایک سوال کے جواب میں امتیاز جلیل نے کہا کہ وزیر اعلی اور وزیر داخلہ نے مہاراشٹر کی عوام کو یہ کہہ دینا چاہئے کہ اب کسی بھی قسم کے تنازعہ کو سڑکوں پر حل کیا جائے گا پولس اور عدالت آنے کی کسی کو ضرورت نہیں تو ہم اسکے لئے بھی تیار ہیں . جائیداد سے متعلق تنازعے کہے جانے بابت انہوں نے کہا کہ ایک 20 ، 21 سال کے لڑکے سے کیا تنازعہ ہوسکتا ہے جس نے بھی اسکو بھیجا ہے ہم اسکے خلاف ہر ممکن کاروائی کریں گے اور جب تک پولس صحیح سمت کاروائی نہیں کرتی ہم خاموش نہیں بیٹھیں گے ۔ لوک سبھا نتائج پر سوال کا جواب دیتے وقت کہا کہ پورے ملک کا سب سے بڑا جشن اورنگ آباد میں منایا جائے گا ۔ ساتھ ہی انہوں نے آگاہی بھی دی کہ لوک سبھا نتائج کے بعد آنے والے اسمبلی الیکشن تک مہاراشٹر کے مختلف شہروں میں طاقت اور غنڈہ گردی کے بل پر اپنی سیاست چمکانے کا کام کیا جاسکتا ہے ۔ پولس محکمہ کو اسکے لئے تیار رہنا چاہئے ۔ صدر مہاراشٹر مجلس اتحادالمسلمین کے دورہ ناسک کے وقت مہاراشٹر کے دیگر شہروں سے مجلس کے ذمہ داران انکے ہمراہ تھے اور سبھوں نے عبدالمالک کو جلد صحتیابی کی دعائیں دی اور امید ظاہر کی کہ ان شاء اللہ بہت ہی جلد عبدالمالک سابق میئر پہلے سے زیادہ طاقتور اور پہلے سے زیادہ دبنگئی سے اہلیان مالیگاؤں اور مجلس کی خدمت کرتے نظر آئیں گے ۔
کوئی تبصرے نہیں:
ایک تبصرہ شائع کریں