کانگریس کے ساتھ مرنے سے بہتر ہے اجیت اور شندے کے ساتھ مل جائے: وزیراعظم مودی کا کھلا آفر
مودی سماج کے محروم طبقات کے حقوق کے تحفظ کا چوکیدار ہے۔
نندوربار : بھارتیہ جنتا پارٹی (بی جے پی) نے ایک بار پھر سبکدوش ہونے والی ایم پی ہینا گاویت کو نندوربار لوک سبھا سیٹ کے لیے نامزد کیا ہے۔ ان کا مقابلہ کانگریس کے گوول پاڈوی سے ہے۔ اس سیٹ پر عام انتخابات کے چوتھے مرحلے میں 13 مئی کو ووٹ ڈالے جائیں گے۔ وزیر اعظم نریندر مودی نے جمعہ کو شمالی مہاراشٹر کے نندوربار ضلع میں ایک انتخابی ریلی سے خطاب کرتے ہوئے کہا کہ نقلی این سی پی اور شیو سینا نے 4 جون کے لوک سبھا انتخابات کے نتائج کے بعد کانگریس میں ضم ہونے کا اپنا ذہن بنا لیا ہے لیکن انہیں اس کے بجائے اجیت پوار اور ایکناتھ شندے کے ساتھ اتحاد کرنا چاہئے۔ نیشنلسٹ کانگریس پارٹی (این سی پی) کے سربراہ شرد پوار کا نام لیے بغیر مودی نے کہا کہ وہ مہاراشٹر کے ایک تجربہ کار لیڈر ہیں، جو 40-50 سالوں سے سیاست میں ہیں۔ بارامتی انتخابات کے بعد وہ اس قدر پریشان اور مایوس ہوچکے ہیں کہ انہوں نے بیان دے دیا کہ اگر وہ 4 جون کے بعد سیاسی زندگی میں زندہ رہنا چاہتے ہیں تو چھوٹی سیاسی جماعتوں کو کانگریس میں ضم ہونا چاہئے۔ مجھے یقین ہے کہ انہوں نے یہ بیان بہت سے لوگوں سے بات چیت کے بعد دیا ہوگا۔
ریلی سے خطاب کرتے ہوئے مودی نے کانگریس پر 'ہندو عقیدے' کو تباہ کرنے کی سازش کرنے کا الزام لگایا۔ انہوں نے کہا کہ کانگریس کے 'پرنس' کے گرو نے امریکہ کو بتایا ہے کہ رام مندر اور رام نومی کا تہوار ہندوستان کے تصور کے خلاف ہے۔ وزیر اعظم نے کہا کہ کانگریس کا ایجنڈہ اتنا خطرناک ہے کہ وہ رام مندر کی تعمیر اور رام نومی کے جشن کو ہندوستان کے تصور کے خلاف قرار دیتی ہے۔ انہوں نے کہا کہ وہ کہہ سکتے ہیں کہ میرا مندر جانا بھارت مخالف ہے۔ کانگریس کی ذہنیت دیکھیں کہ رام کی زمین پر رام کا مندر بھارت مخالف ہے۔
انہوں نے کہا کہ یہ لوگ سرکاری افطار پارٹیوں کا اہتمام کرتے ہیں اور دہشت گردوں کی قبروں کو سجاتے ہیں۔ مودی کو مہاراشٹر میں مغل بادشاہ اورنگزیب کی طرح دفن کرنے کے بارے میں شیوسینا لیڈر سنجے راوت کے مبینہ تبصرہ کی طرف اشارہ کرتے ہوئے وزیر اعظم نے کہا کہ شیو سینا کے نقلی لوگ انہیں زندہ دفن کرنے کی بات کرتے ہیں۔ انہوں نے کہا کہ نقلی شیوسینا مجھے زندہ دفن کرنا چاہتی ہے۔ وہ مجھے اس طرح گالیاں دیتے ہیں کہ اس سے ان کے پسندیدہ ووٹ بینک خوش ہوں۔ یہ لوگ عوامی حمایت کھو چکے ہیں اور ان کی سیاست ختم ہو چکی ہے۔ ہندوستان کے لوگ میری حفاظت کا کمبل ہیں۔ یہ لوگ مجھے زندہ یا مردہ دفن نہیں کر سکتے۔
مودی نے کہا کہ مذہب کی بنیاد پر ریزرویشن کا فائدہ دینا آئین میں درج اقدار اور اصولوں کے خلاف ہے۔ انہوں نے کہا کہ جب تک مودی زندہ ہیں میں مذہب کی بنیاد پر مسلمانوں کو دلتوں، قبائلیوں، او بی سی کا ریزرویشن نہیں ہونے دوں گا۔ مودی نے کہا کہ قبائلیوں اور محروم طبقوں کی خدمت کرنا ان کے خاندان کے افراد کی خدمت کے مترادف ہے۔ انہوں نے کہا کہ میں کانگریس کے شاہی خاندان کی طرح نہیں ہوں، لیکن ایک غریب گھرانے میں پلا بڑھا ہوں۔ آزادی کے 60 سال بعد بھی آدیواسیوں اور غریبوں کو مکانات، بجلی اور پانی کی کمی کے معاملے میں بہت نقصان اٹھانا پڑا۔ لیکن میری حکومت نے ان کی زندگیوں کو بہتر بنانے کے لیے سخت محنت کی ہے۔
انہوں نے کہا کہ کانگریس کو قبائلیوں کی کوئی فکر نہیں ہے اور اس نے قبائلیوں میں پائے جانے والے اسکیل سیل انیمیا کو ختم کرنے کے لیے کچھ نہیں کیا۔ مودی نے کہا کہ ان کی حکومت نے قبائلی عوام کی آنے والی نسلوں کو محفوظ بنانے کے لیے اس سمت میں قدم اٹھایا ہے۔ انہوں نے کہا کہ کانگریس جانتی ہے کہ وہ ترقی کے معاملے میں مودی کا مقابلہ نہیں کر سکتی، اس لیے اس نے ریزرویشن اور آئین پر جھوٹ کا کارخانہ کھول دیا ہے۔ ان کا ایکو سسٹم افواہوں سے بھرا ہوا ہے۔
انہوں نے کہا کہ آئین کو تبدیل کرنے کی افواہ کانگریس کے لیے 'چور مچائے شور' کے سوا کچھ نہیں ہے۔ وہ مذہب کی بنیاد پر ریزرویشن نافذ کرنا چاہتی ہے جو کہ آئین کے خلاف ہے۔ ایسی کوشش کرنا آئین کے خالق کی پیٹھ میں چھرا گھونپنے کے مترادف ہے۔ مودی نے الزام لگایا کہ کانگریس ایس سی، ایس ٹی اور او بی سی سے ریزرویشن چھین کر اقلیتی ووٹ بینک کو دے کر اپنے کرناٹک ماڈل کو ملک بھر میں دہرانا چاہتی ہے۔ انہوں نے کہا کہ کرناٹک میں کانگریس نے مسلمانوں کو راتوں رات او بی سی بنا دیا اور اب وہ قبائلیوں اور دلتوں کا ریزرویشن چھیننا چاہتی ہے۔
انہوں نے کہا کہ مہا وکاس اگھاڑی ریزرویشن ختم کرنے کے لیے 'مہا ابھیان' چلا رہی ہے جب کہ میں اسے بچانے کے لیے 'مہا رکشا کا مہایگیہ' کر رہا ہوں۔ انہوں نے کہا کہ میں کانگریس کو چیلنج کر رہا ہوں کہ وہ تحریری طور پر دے کہ وہ ایس سی/ایس ٹی کوٹہ ختم نہیں کرے گی اور مسلمانوں کو نہیں دے گی۔ لیکن کانگریس کوئی جواب نہیں دے رہی ہے۔ ان کا آپ کے حقوق پر ڈاکہ ڈالنے کا خفیہ ایجنڈہ ہے۔ لیکن مودی سماج کے محروم طبقات کے حقوق کے تحفظ کا چوکیدار ہے۔
کوئی تبصرے نہیں:
ایک تبصرہ شائع کریں