ممبئی : دوست کے پیٹ میں گولی مار کر فرار، ملزم کورونا کے دور میں پیرول پر رہا ہوا اور واپس جیل نہیں گیا۔
ممبئی: ایک شخص نے ہفتہ کی صبح انٹاپ ہل میں اپنے دوست کے گھر میں گھس کر اس کے پیٹ میں گولی مار دی۔ اس کی حالت تشویشناک ہے۔ ذرائع نے انکشاف کیا ہے کہ حملہ آور کو 2017 میں گورے گاؤں میں ایک قتل کیس میں مجرم قرار دیا گیا تھا۔ کوویڈ کے وقت بہت سے قیدیوں کو پیرول پر رہا کیا گیا تھا۔ وویک شیٹھیار بھی ان میں شامل تھا، لیکن وہ دوبارہ جیل واپس نہیں گیا۔ اس کے خلاف سنگین جرائم کے نو مقدمات درج ہیں۔
پولیس ذرائع کے مطابق 40 سالہ وویک شیٹھیار نے اپنے دوست 30 سالہ آکاش سوامی کے ساتھ جمعہ کی رات شراب پی۔ دونوں کے درمیان کسی بات پر جھگڑا ہوا۔ اس کے بعد دونوں اپنے اپنے گھر چلے گئے۔ آکاش کا گھر سائن کولی واڑہ علاقے میں ایک چرچ کے قریب ہے۔ آکاش اپنے گھر میں سو رہا تھا جب ہفتہ کی صبح پانچ بجے اس کے دروازے کی گھنٹی بجی۔ اس نے دروازہ کھولا تو سامنے وویک کھڑا تھا۔ اس سے پہلے کہ وہ کچھ سمجھ پاتا، وویک نے اس کے پیٹ میں دیسی ساختہ پستول لگا کر گولی چلا دی۔
آکاش گھر میں ہی گر گیا۔ ملزم فوراً وہاں سے فرار ہوگیا۔ کچھ دیر بعد جب اس کے پڑوسی نے اسے زمین پر گرے ہوئے دیکھا تو اسے سائن اسپتال میں داخل کرایا۔ سائن پولیس کو اطلاع دی گئی۔ چونکہ جس علاقے میں فائرنگ کی گئی وہ انٹاپ ہل پولیس کے دائرۂ اختیار میں آتا ہے، اس لیے کیس کو تحقیقات کے لیے انٹاپ ہل پولیس کے حوالے کریا گیا۔
کوئی تبصرے نہیں:
ایک تبصرہ شائع کریں