ا
احمد نگر میں جیل کی کھڑکی توڑ کر چار خطرناک قیدی فرار،
احمد نگر: مہاراشٹر کے احمد نگر ضلع میں جیل توڑنے کا واقعہ سامنے آیا ہے۔ سنگین جرائم میں سزا کاٹ رہے چار قیدی جیل کی کھڑکی توڑ کر فرار ہو گئے۔ ریاست میں یہ بڑا جیل بریک ایک ایسے وقت میں سامنے آیا ہے جب للت پٹیل کے پونے کے اسپتال سے فرار اور اس کی گرفتاری کا معاملہ پہلے ہی سرخیوں میں ہے۔ جیل انتظامیہ نے قیدیوں کے فرار ہونے کے حوالے سے مقامی تھانے میں شکایت درج کرائی ہے۔ چنانچہ جیل سے قیدیوں کے فرار ہونے کے بعد اب مقامی پولیس کی ٹیمیں چھاپہ مار کاروائیوں میں مصروف ہیں۔ احمد نگر ضلع کی سنگمنیر جیل سے فرار ہونے والے قیدیوں کے خلاف کئی تھانوں میں عصمت دری، قتل، ڈکیتی جیسے سنگین جرائم کے مقدمات درج ہیں۔
پولیس کے مطابق، آج صبح چاروں قیدیوں نے سنگمنیر جیل احاطے میں ہنگامہ کیا۔ اس کے بعد وہ جیل کے سیکیورٹی اہلکاروں کو چکمہ دیتے ہوئے کھڑکی توڑ کر فرار ہو گئے۔ پولیس کا کہنا ہے کہ مفرور قیدیوں کی تلاش کے لیے مختلف ٹیمیں روانہ کر دی گئی ہیں۔ اس واردات سے ضلع میں سنسنی پھیل گئی ہے۔ ان ملزمان کی گرفتاری کے لیے پولیس ٹیمیں مختلف سمتوں میں روانہ ہو گئی ہیں۔ لیکن جیل سے قیدیوں کے فرار ہونے سے سنگمنیر جیل انتظامیہ کی لاپرواہی کھل کر سامنے آئی ہے۔ احمد نگر پولیس نے ان مجرموں کو پکڑنے کے لیے نمبر 024-25225333 بھی جاری کیا ہے۔ عوام سے اپیل کی گئی ہے کہ اگر کوئی اطلاع ملے تو شیئر کریں۔ جیل کی کھڑکی توڑ کر فرار ہونے کی یہ واردات صبح تقریباً پونے سات بجے ہوئی۔
معلومات کے مطابق یہ چار قیدی دیگر کے ساتھ احمد نگر ضلع کی سنگمنیر سب جیل میں تھے۔ جیل میں کل تین بیرکیں ہیں۔ اس جیل کی گنجائش 24 قیدیوں کی ہے، لیکن جیل اکثر گنجائش سے زیادہ ہوتی ہے۔ جب جیل بریک کا واقعہ ہوا تو سب جیل میں 56 قیدی تھے۔ اس جیل میں کل رات معمول کے مطابق تین پولیس اہلکار موجود تھے۔ لیکن پھر بھی چار قیدی جیل کا صحن عبور کر کے فرار ہو گئے۔ جیل سے فرار ہونے والے قیدیوں کی شناخت راہول دیوی داس کالے، روشن رمیش ڈاڈیل، انیل چابو دھولے اور مچندرا مناجی جادھو کے طور پر کی گئی ہے۔ ان کے خلاف دفعہ 302، 307، 376 اور 307 کے تحت جرائم درج کیے گئے ہیں۔
کوئی تبصرے نہیں:
ایک تبصرہ شائع کریں