مراٹھا ریزرویشن پر شندے حکومت کے خلاف چھگن بھجبل کے باغی تیور
او بی سی کے ساتھ ناانصافی کو برداشت نہیں کیا جائے گا۔ مراٹھا برادری کو او بی سی کوٹہ سے الگ ریزرویشن دیا جائے۔
ممبئی: شندے حکومت کے لیے مراٹھا ریزرویشن کا راستہ مشکل ہو سکتا ہے۔ حکومت کے وزیر چھگن بھجبل نے سخت رویہ ظاہر کیا ہے اور واضح طور پر کہا ہے کہ او بی سی کے ساتھ ناانصافی کو برداشت نہیں کیا جائے گا۔ مراٹھا برادری کو او بی سی کوٹہ سے الگ ریزرویشن دیا جائے۔ اگر ایسا نہیں ہوتا ہے تو او بی سی برادری اس کی مخالفت کرے گی۔ ہم حکومت میں رہتے ہوئے جدوجہد کریں گے۔ او بی سی برادری خاموش نہیں رہے گی۔ بھجبل کے بیان کے بعد کابینی وزیر شمبھوراج دیسائی نے کہا کہ بھجبل کو ایسا بیان نہیں دینا چاہیے۔ ان کا بیان لوگوں میں بھرم پیدا ہوگا۔ وزیر اعلیٰ ایکناتھ شندے پہلے ہی واضح کر چکے ہیں کہ ریزرویشن کسی سے چھین کر کسی دوسرے طبقے کو نہیں دیا جائے گا۔
او بی سی برادری نے دیوالی کے بعد ریاست گیر احتجاج کا انتباہ دیا ہے۔ منگل کو وزیر چھگن بھجبل سے ملاقات کے بعد صحافیوں سے بات کرتے ہوئے او بی سی لیڈر پرکاش شینڈگے نے کہا کہ مراٹھا برادری کو کنبی سرٹیفکیٹ دینے کا فیصلہ کیا گیا ہے۔ حکومت کے اس فیصلے سے او بی سی برادری کے ریزرویشن میں کمی آئے گی، اس لیے دیوالی کے تہوار کے بعد او بی سی برادری حکومت کے اس فیصلے کے خلاف احتجاج کے لیے ریاست گیر تحریک چلائے گی۔
مراٹھا برادری کو ریزرویشن دینے کے لیے شندے حکومت نے کنبی برادری کو او بی سی سرٹیفکیٹ دینے کا فیصلہ کیا ہے، جس کی او بی سی برادری کے لیڈران مخالفت کر رہے ہیں۔ او بی سی لیڈروں کی میٹنگ کا دور شروع ہو گیا ہے۔ شندے حکومت کے وزیر چھگن بھجبل نے بیڑ ضلع میں اس جگہ کا دورہ کیا جہاں مراٹھا ایجی ٹیشن کے دوران کچھ واقعات ہوئے تھے۔ بھجبل نے قائدین کے گھروں اور دفاتر کو آگ لگانے والے مشتعل افراد کی سخت مذمت کی اور او بی سی کے حقوق کے لیے لڑنے کا اعلان کیا۔
کوئی تبصرے نہیں:
ایک تبصرہ شائع کریں