ملنڈ میں سوا مہینے کی شیرخوار بچی کو 14 ویں منزل سے پھینک دیا۔ پولیس نے کیا ماں کے خلاف قتل کا مقدمہ درج
ممبئی کے ملنڈ علاقے میں ایک چونکا دینے والا واقعہ پیش آیا ہے۔ یہاں ایک خاتون نے اپنی 40 دن کی بیٹی کو اٹھا کر 14ویں منزل کی بالکونی سے نیچے پھینک دیا۔ لڑکی کو فوری طور پر اسپتال لے جایا گیا، جہاں ڈاکٹروں نے اسے مردہ قرار دے دیا۔ اطلاع ملنے پر پولیس موقع پر پہنچ گئی اور خاتون کے خلاف بچی کے قتل کا مقدمہ درج کر لیا گیا۔ تادم تحریر خاتون کو گرفتار نہیں کیا گیا ہے۔
پولیس کے مطابق خاتون بولنے اور سننے سے قاصر ہے اس لیے ابھی تک اس سے صحیح طریقے سے پوچھ تاچھ نہیں کی گئی۔ اس لیے اس واقعے کے پیچھے کی وجوہات ابھی تک واضح نہیں ہوسکی ہیں۔ پولس کے مطابق یہ واقعہ جمعرات کی دیر شام ملنڈ ویسٹ کے جیور روڈ پر پیش آیا۔ یہاں کی ایک سوسائٹی میں رہنے والی یہ معذور خاتون 14ویں منزل پر اپنے خاندان کے ساتھ رہتی تھی۔ اس نے 40 دن پہلے بیٹی کو جنم دیا تھا۔
ان 40 دنوں میں اس کے گھر میں ایسے حالات پیدا ہوئے کہ غصے میں آکر خاتون نے اپنی معصوم بیٹی کو بالکونی سے نیچے پھینک دیا۔ شبہ ہے کہ بیٹی کی پیدائش کو لے کر گھر میں کوئی جھگڑا چل رہا تھا۔ تاہم پولیس ابھی تک اس معاملے میں کچھ کہنے سے گریز کر رہی ہے۔ پولیس کے مطابق واقعے کی وجہ تاحال واضح نہیں ہوسکی ہے۔
پولیس نے بتایا کہ فی الحال اس خاتون کے خلاف قتل کا مقدمہ درج کر کے تفتیش شروع کر دی گئی ہے۔ پولیس کے مطابق اس خاتون کے سات ماہ کے بچے کی گزشتہ سال جولائی میں موت ہو گئی تھی۔
کوئی تبصرے نہیں:
ایک تبصرہ شائع کریں