مہاراشٹر: شیوسینا کے باغی ایم ایل اے گوا ائیرپورٹ پہنچے، جلد ممبئی روانہ ہوں گے، 4 جولائی کو فلور ٹیسٹ ہوگا
مہاراشٹر میں نئی حکومت کی حلف برداری کے بعد شیوسینا اپنے باغی ایم ایل اے کی معطلی کے لیے سپریم کورٹ پہنچی تھی۔ شیوسینا کے چیف وہپ سنیل پربھو نے نئے وزیر اعلی ایکناتھ شندے اور ان 15 دیگر ایم ایل ایز کو ایوان سے معطل کرنے کا مطالبہ کیا تھا۔ تاہم عدالت نے فوری طور پر سماعت کرنے سے انکار کر دیا۔
ایکناتھ شندے کے 30 جون کو مہاراشٹر کے وزیر اعلی کے طور پر حلف لینے کے دو دن بعد، باغی شیوسینا ایم ایل ایز نے ممبئی واپس آنے کا فیصلہ کیا۔ چار دن تک گوا میں کیمپ لگانے کے بعد ہفتہ کو سبھی گوا ایئرپورٹ پہنچ گئے ہیں۔ جلد ہی وہ ممبئی پہنچ جائیں گے۔ تمام ایم ایل اے کو دو بسوں کے ذریعے ائیرپورٹ لے جایا گیا۔
ایکناتھ شندے جمعہ کی رات دیر گئے گوا کے تاج ہوٹل پہنچے تھے، جہاں شیوسینا کے باغی گروپ کے تمام ایم ایل ایز موجود ہیں۔ وہ تمام ایم ایل ایز کے ساتھ ممبئی واپس آرہے ہیں۔ واضح رہے کہ آج شام ہی بی جے پی کے ممبران اسمبلی کے ساتھ شندے گروپ کے ایم ایل اے کی کوآرڈینیشن میٹنگ ہے۔
مہاراشٹر کے گورنر بھگت سنگھ کوشیاری نے 3 اور 4 جولائی کو قانون ساز اسمبلی کا خصوصی اجلاس بلایا ہے۔ 4 جولائی کو ایکناتھ شندے کو اپنی اکثریت ثابت کرنی ہوگی۔ اسپیکر کا انتخاب 3 جولائی کو ہوگا اور شندے حکومت کو 4 جولائی کو فلور ٹیسٹ کا سامنا کرنا پڑے گا۔
دوسری طرف، ادھو ٹھاکرے نے ایکناتھ شندے کو پارٹی مخالف سرگرمیوں میں ملوث ہونے پر شیوسینا کے تمام عہدوں سے برخاست کردیا ہے۔ باغی گروپ کے لیڈر دیپک کیسرکر نے کہا ہے کہ ہم ادھو ٹھاکرے کے اس فیصلے کو چیلنج کریں گے۔ شیوسینا نے شندے صاحب کو عہدے سے ہٹا دیا ہے لیکن جس طرح سے نوٹس دیا گیا ہے وہ قابل اعتراض ہے۔ ہم اس کا جواب بھیجیں گے۔ اگر جواب دینے کے بعد وہ ضروری کاروائی نہیں کرتے تو ہم قانونی صلاح مشورہ لیں گے۔
کوئی تبصرے نہیں:
ایک تبصرہ شائع کریں