آپریشن گنگا: مزید 600 ہندوستانیوں کی وطن واپسی
نئی دہلی،3 مارچ : ہندوستانی فضائیہ (آئی اے ایف) کے تین سی-17 طیارے بدھ کی شب اور جمعرات کی صبح کے درمیان یوکرین میں پھنسے 600 سے زیادہ ہندوستانیوں کو لے کر غازی آباد کے ہنڈن ایئر فورس اسٹیشن پہنچے۔
آئی اے ایف کا پہلا سی-17 طیارہ رومانیہ کی راجدھانی بخاریسٹ سے 200 مسافروں کو لے کر کل رات تقریباً 1:30 بجے یہاں پہنچا۔ وزیر مملکت برائے دفاع اجے بھٹ نے خود انڈین ایئر فورس اسٹیشن پہنچنے والے لوگوں کا استقبال کیا۔انہوں نے ٹویٹ کیا کہ وہ ہندوستانی فضائیہ کے عملے اور پائلٹس کی چوبیس گھنٹے خدمات اور ہندوستانی شہریوں کو بحفاظت وطن واپس لانے میں حکومت کی کوششوں کی کے لئے بے حد مشکور ہیں۔
دوسرا سی -17 طیارہ بڈاپیسٹ سے 220 ہندوستانیوں کو لے کر صبح 5:40 بجے ایئر فورس اسٹیشن پہنچا۔ اسی وقت تیسرا سی-17 طیارہ 208 ہندوستانی شہریوں کو لے کر پولینڈ کے راجوف سے صبح 7 بجے ہنڈن پہنچا۔ مسٹر بھٹ نے گھر واپس آنے والے لوگوں کا استقبال کیا اور ان سے بات چیت کی۔ انہوں نے تمام ہندوستانیوں کو جنگ زدہ یوکرین سے وطن واپس لانے تک کوششیں جاری رکھنے کے حکومت کے عزم کے بارے میں آگاہ کیا۔
فضائیہ کے نائب سربراہ ایئر مارشل سندیپ سنگھ نے بدھ کو کہا کہ آئی اے ایف یوکرین سے چوبیس گھنٹے انخلاء کی کارروائیاں کرے گی۔
آپریشن گنگا کے بارے میں تفصیلات بتاتے ہوئے، وزیر خارجہ ایس جے شنکر نے بدھ کو دیر گئے کہا کہ ہنگری، رومانیہ، سلوواکیہ اور پولینڈ سے بدھ کو نو پروازیں چلائی گئیں اور مزید چھ کے جلد ہی روانہ ہونے کی امید ہے۔
انہوں نے ٹویٹ کیا’’مجموعی طور پر، 3000 سے زیادہ ہندوستانی شہریوں کو واپس لایا گیا ہے۔‘‘
کوئی تبصرے نہیں:
ایک تبصرہ شائع کریں