معطل ارکان پارلیمنٹ کاروائی کے خلاف پارلیمنٹ کے احاطے میں دھرنے پر بیٹھے

 نئی دہلی، یکم دسمبر : پارلیمنٹ کے مانسون اجلاس کے دوران راجیہ سبھا میں ’غیر مہذب برتاؤ‘ کی وجہ سے معطل کیے گئے 12 اراکین پارلیمنٹ بدھ کو اس کارروائی کے خلاف پارلیمنٹ کے احاطے میں دھرنے پر بیٹھ گئے ہیں دھرنے پر بیٹھے ارکان پارلیمنٹ معطلی ختم کرنے کا مطالبہ کرتے ہوئے سیشن کے دوران ہر روز صبح 10 بجے سے شام 6 بجے تک دھرنے پر بیٹھیں گے کانگریس لیڈر راہل گاندھی بھی معطلی کے خلاف احتجاج کر رہے ہیں اور وہ ممبران پارلیمنٹ کی حمایت کے لئے پہنچے۔ راجیہ سبھا میں اپوزیشن سینئر لیڈر ملکارجن کھرگے اور کئی دیگر پارٹیوں کے لیڈر بھی حمایت میں پہنچے۔ اس موقع پر خطاب کرتے ہوئے مسٹر کھڑگے نے کہا ’’ہم مطالبہ کرتے ہیں کہ راجیہ سبھا کے تمام 12 معطل ارکان پارلیمنٹ کی معطلی واپس لی جائے۔ ہم میٹنگ کے بعد حکمت عملی طے کریں گے‘‘۔

دھرنے پر بیٹھی ترنمول کانگریس کی رکن پارلیمنٹ ڈولا سین نے کہا ’’ارکان پارلیمنٹ کی معطلی حکومت کی تکبر کو ظاہر کرتی ہے۔ جب بی جے پی اپوزیشن میں تھی تو وہ بھی پارلیمنٹ کی کارروائی متاثر کرتے تھے۔ جب تک ہمیں انصاف نہیں ملتا ہمارا دھرنا جاری رہے گا‘‘۔

دراصل، اگست کے مہینے میں مانسون اجلاس کے دوران، ان تمام ممبران پارلیمنٹ پر راجیہ سبھا میں زبردست ہنگامہ کرنے اور مارشلوں کے ساتھ ہاتھا پائی کا الزام لگا تھا۔ ایک بل پر بحث کے دوران ارکان پارلیمنٹ نے کاغذات پھاڑ دیے تھے اور دھکا مکی کی تھی۔