کسان ہمیں معاف کریں، تینوں زرعی قوانین واپس ہوں گے، مشتعل کسان گھر واپس ہوں: مودی

کسان ہمیں معاف کریں، تینوں زرعی قوانین واپس ہوں گے، مشتعل کسان گھر واپس ہوں : مودی

  نئی دہلی، 19 نومبر : پہلے سکھ گرو نانک دیو جینتی کے 552 ویں یوم پیدائش کے موقع پر وزیر اعظم نریندر مودی نے آج ان کسانوں سے معافی مانگی جو ایک سال سے زیادہ عرصے سے احتجاج کر رہے ہیں اور تین متنازعہ زرعی قوانین کو واپس لینے کا اعلان کیا ہے۔ احتجاج کرنے والے کسانوں سے گھر واپس ہونے کی اپیل کی۔
جمعہ کی صبح قوم کے نام ایک پیغام میں مسٹر مودی نے کہاکہ "آج ہم وطنوں سے معافی مانگتے ہوئے میں سچے دل اور صاف دل سے کہنا چاہتا ہوں کہ شاید ہماری تپسا میں کوئی کمی رہ گئی ہوگی۔ جس کی وجہ دیئے کی روشنی جیسی سچائی کو ہم بھائیوں کو سمجھا نہیں پائے۔ آج گرو نانک دیو جی کی روشنی کا مقدس تہوار ہے۔ یہ وقت کسی پر الزام لگانے کا نہیں ہے۔ آج میں آپ کو اورپورے ملک کو بتانے آیا ہوں کہ ہم نے تینوں زرعی قوانین کو واپس لینے کا فیصلہ کیا ہے۔ اس ماہ کے آخر میں شروع ہونے والے پارلیمنٹ کے اجلاس میں ہم ان تینوں زرعی قوانین کو منسوخ کرنے کے لیے آئینی عمل کو مکمل کریں گے۔
انہوں نے مشتعل کسانوں پر زور دیا کہ وہ گرو پرو کے موقع پر ایجی ٹیشن ختم کریں اور اپنے اہل خانہ کے ساتھ تہوار منائیں اور کھیتوں میں کام شروع کریں۔
انہوں نے کہاکہ "میں اپنے تمام احتجاج کرنے والے کسان ساتھیوں سے درخواست کر رہا ہوں، آج گرو پرو کا مقدس دن ہے۔ اب تو اپنے گھروں کو لوٹ جائیں، اپنے کھیتوں میں لوٹ جائیں، اپنے گھر والوں کے پاس لوٹ جائیں۔ آئیے ایک نئی شروعات کریں۔ آئیے نئے سرے سے آگے بڑھیں۔"