اگر کوئی ملک, ہندوستان کی طرف آنکھ اتھاکر دیکھے گا تو اسے منہ توڑ جواب ملے گا: راجناتھ

اگر کوئی ملک, ہندوستان کی طرف آنکھ اتھاکر دیکھے گا تو اسے منہ توڑ جواب ملے گا : راج ناتھ

 نینی تال، 20 نومبر (یو این آئی) وزیر دفاع راج ناتھ سنگھ نے ہفتہ کو چین اور پاکستان دونوں کو بیک وقت نشانہ بناتے ہوئے کہا کہ اگر کوئی ملک ہندوستان کی طرف آنکھ اٹھاکر دیکھے گا تو اسے منہ توڑ جواب بھی ملے گا۔

چین کی سرحد سے متصل اتراکھنڈ کے پتھورا گڑھ ضلع سے مسٹر سنگھ نے جمعہ کو اپنے دشمنوں کو دو واضح پیغامات دیئے۔ انہوں نے کہا کہ چھیڑو گے تو چھوڑیں گے نہیں۔ اندر سے مار یں گے اور ہندوستان اور نیپال دوست ممالک ہیں اور دونوں کی دوستی میں کوئی دوری پیدا نہیں کر سکتا۔
مسٹر سنگھ مونا کوٹ کے جولکھیٹ میں سمان یاترا کے دوسرے مرحلے میں شامل ہوئے اور یاترا کو ہری جھنڈی دکھا ئی۔ انہوں نے سابق فوجیوں کے ساتھ یہاں ایک جلسہ عام سے بھی خطاب کیا۔
اس موقع پر انہوں نے بیک وقت چین اور پاکستان دونوں کو نشانہ بنایا۔ انہوں نے کہا کہ ہندوستان نے سرجیکل اور فضائی حملوں کے ذریعے واضح پیغام دیا ہے کہ اگر آپ نے چھیڑ چھاڑ کی تو ہم نہیں چھوڑیں گے اور دشمن کی سرزمین کے اندر گھس کر ماریں گے۔

انہوں نے چین کی سرحد سے بھی اسی کی زبان میں پیغام دیا اور کہا کہ ہندوستان کی ثقافت اور روایت رہی ہے کہ وہ اپنے پڑوسیوں کے ساتھ خوشگوار ماحول اور اچھے تعلقات قائم کرنا چاہتا ہے۔ ہندوستان نہ تو کسی ملک پر حملہ کرتا ہے اور نہ ہی کسی کی سرزمین پر قبضہ کرنے کا ارادہ رکھتا ہے لیکن اگر کوئی ملک ہندوستان کی طرف میلی آنکھ سے دیکھے گا تو اسے بھی منہ توڑ جواب دیا جائے گا۔