مالیگاؤں میں دلخراش سڑک حادثہ: سابق کارپوریٹر عبدالباقی راشن والے کے جواں سال فرزند عمران عبدالباقی جاں بحق، شہر سوگوار
مالیگاؤں : (مہاراشٹر نامہ ڈیسک)شہر مالیگاؤں آج ایک اندوہناک خبر سے غم و الم میں ڈوبا ہوا ہے۔ مرچنٹ نگر، عوامی نگر سمیت شہر کی معروف و باوقار سماجی و سیاسی شخصیت، سابق کارپوریٹر اور سماجوادی پارٹی سے وابستہ عبدالباقی راشن والے کے جواں سال فرزند عمران عبدالباقی راشن والے ایک دلخراش سڑک حادثے میں جان کی بازی ہار گئے۔ یہ المناک حادثہ جمعرات اور جمعہ کی درمیانی شب تقریباً تین بجے سٹانہ ناکہ کے قریب پیش آیا، جس نے نہ صرف اہلِ خانہ بلکہ پورے شہر کو گہرے صدمے سے دوچار کر دیا۔
تفصیلات کے مطابق عمران عبدالباقی راشن والے اپنی گاڑی سے سٹانہ ناکہ کے راستے سے گزر رہے تھے کہ اچانک ان کی گاڑی حادثے کا شکار ہو گئی۔ حادثہ اس قدر شدید تھا کہ عمران کو چہرے اور جسم کے دیگر حصوں پر گہری اور جان لیوا چوٹیں آئیں۔ حادثے کی اطلاع ملتے ہی سماجی کارکن مستقیم ڈگنیٹی اپنے دوستوں کے ہمراہ فوری طور پر جائے حادثہ پر پہنچے اور زخمی عمران کو مالیگاؤں کے سول (جنرل) اسپتال منتقل کیا۔ تاہم اسپتال پہنچنے پر ڈاکٹروں نے معائنہ کے بعد انہیں مردہ قرار دے دیا۔
رات گئے اس اندوہناک واقعے کی خبر شہر میں جنگل کی آگ کی طرح پھیل گئی۔ پولیس کو بھی فوری طور پر اطلاع دی گئی، جس کے بعد پولیس نے موقع پر پہنچ کر جانچ پڑتال شروع کر دی۔ ابتدائی تفتیش میں یہ واضح نہیں ہو سکا ہے کہ عمران کی گاڑی کو کس دوسری گاڑی نے ٹکر ماری یا وہ کسی اور گاڑی سے جا ٹکرائے۔ تاہم ان کے چہرے پر گہرے زخم اس بات کی گواہی دے رہے تھے کہ حادثہ نہایت خوفناک نوعیت کا تھا۔ پولیس اس بات کی بھی تحقیقات کر رہی ہے کہ یہ محض ایک حادثہ تھا یا اس کے پیچھے کوئی اور پہلو بھی موجود ہے۔ تفتیش جاری ہے اور مختلف زاویوں سے معاملے کی چھان بین کی جا رہی ہے۔
مرحوم عمران عبدالباقی راشن والے نہ صرف ایک خوش اخلاق اور ملنسار نوجوان تھے بلکہ اپنے والد کے شانہ بشانہ سماجی اور عوامی خدمات میں بھی بڑھ چڑھ کر حصہ لیتے تھے۔ انہوں نے کم عمری کے باوجود خدمتِ خلق کو اپنا شعار بنایا اور عوامی مسائل کے حل کے لیے ہمیشہ سرگرم رہے۔ ان کی اچانک اور المناک موت نے اہلِ خانہ، عزیز و اقارب، دوست احباب، محلہ مکینوں اور سماجوادی پارٹی کے کارکنان کو گہرے رنج و غم میں مبتلا کر دیا ہے۔
یہ بات قابلِ ذکر ہے کہ مرحوم کے والد عبدالباقی راشن والے سماجوادی پارٹی کے اہم امیدوار رہ چکے ہیں اور سابق کارپوریٹر کی حیثیت سے شہر میں اپنی ایک الگ شناخت رکھتے ہیں۔ ایسے میں ان کے جواں سال فرزند کا اس طرح دنیا سے رخصت ہو جانا یقیناً ایک ناقابلِ تلافی نقصان ہے، جس کا ازالہ ممکن نہیں۔
اس دکھ کی گھڑی میں شہر کی سماجی، سیاسی اور مذہبی شخصیات نے مرحوم کے اہلِ خانہ سے تعزیت کا اظہار کیا ہے اور ان کے لیے صبر و استقامت کی دعا کی ہے۔ ہم بھی بارگاہِ الٰہی میں دعا گو ہیں کہ اللہ تعالیٰ مرحوم عمران عبدالباقی راشن والے کی مغفرت فرمائے، ان کے درجات بلند کرے اور پسماندگان کو یہ عظیم صدمہ برداشت کرنے کی توفیق عطا فرمائے۔
کوئی تبصرے نہیں:
ایک تبصرہ شائع کریں