مہاراشٹر حکومت کی کابینہ میں توسیع:
شندے گروپ اور بی جے پی کے 9-9 ارکان شامل، 18 وزراء نے لیا حلف
ممبئی: مہاراشٹر کے وزیر اعلی کے طور پر حلف لینے کے 41 دن بعد، ایکناتھ شندے نے منگل کو اپنی دو رکنی کابینہ میں توسیع کی۔ بھارتیہ جنتا پارٹی (بی جے پی) کی ریاستی اکائی کے صدر چندرکانت پاٹل سمیت 18 ایم ایل ایز نے جنوبی ممبئی کے راج بھون میں کابینہ کے وزراء کے طور پر حلف لیا۔ کابینہ میں کسی خاتون کو شامل نہیں کیا گیا۔
اس کے ساتھ ہی مہاراشٹر کی کابینہ میں ارکان کی تعداد اب بڑھ کر 20 ہوگئی ہے، جو کہ 43 ارکان کی زیادہ سے زیادہ تعداد کے نصف سے بھی کم ہے۔ شندے نے 30 جون کو وزیر اعلی اور دیویندر فڈنویس نے نائب وزیر اعلی کے طور پر حلف لیا تھا۔ گورنر بی ایس کوشیاری نے وزراء کو عہدے کا حلف دلایا۔ پروگرام صبح 11 بجے شروع ہونا تھا لیکن 15 منٹ کی تاخیر سے شروع ہوا۔
حلف لینے والے وزراء میں شندے گروپ اور بی جے پی کے نو ارکان شامل ہیں۔ رادھا کرشن وکھے پاٹل، سدھیر منگنٹیوار، چندرکانت پاٹل، وجے کمار گاویت، گریش مہاجن، سریش کھڈے، رویندر چوہان، اتل سیو اور منگل پربھات لودھا بی جے پی کابینہ کے ارکان میں شامل ہیں۔ شندے گروپ کی طرف سے وزیر کے طور پر حلف لینے والے گلاب راؤ پاٹل، دادا بھسے، سنجے راٹھوڑ، سندیپ بھومرے، ادئے سامنت، تانا جی ساونت، عبدالستار، دیپک کیسرکر اور شمبھوراج دیسائی وزراء شامل ہیں.
شندے کے ایک معاون نے کہا کہ آج کسی بھی ریاستی وزیر نے حلف نہیں لیا۔ بعد میں کابینہ میں دوبارہ توسیع کی جائے گی۔ بی جے پی نے ممبئی سے لودھا کو شامل کیا ہے، جب کہ شندے گروپ نے وہاں سے کسی بھی ایم ایل اے کو کابینہ میں شامل نہیں کیا۔ ممبئی میونسپل کارپوریشن کے انتخابات اس سال ہونے والے ہیں۔
کوئی تبصرے نہیں:
ایک تبصرہ شائع کریں