فرخ آباد میں ٹیچر باپ نے دو بیٹیوں کو قتل کرنے کے بعد لگائی پھانسی، خودکشی نوٹ میں  کیا چونکا دینے والا انکشاف

 فرخ آباد: اترپردیش کے فرخ آباد ضلع میں ایک ٹیچر نے پہلے اپنی دو معصوم بیٹیوں کا گلا دبا کر قتل کیا اور پھر خود کو پھانسی لگا کر موت کے گھاٹ اتار دیا۔  اس واردات کے بعد پورے علاقے میں کہرام مچ گیا ہے۔  واقعہ کی صبح جب بچے ٹیوشن پڑھنے ٹیچر کے گھر پہنچے تو کافی دیر تک دروازہ نہ کھلنے پر باہر کھڑے بچوں کو دیکھ کر آس پاس کے لوگ موقع پر جمع ہوگئے۔  اس کے بعد جب آس پاس رہنے والے فوجیوں کو واقعہ کی اطلاع ملی تو انہوں نے گھر کا دروازہ توڑ دیا۔  جس کے بعد اندر کا نظارہ دیکھ کر تمام لوگوں کے پیروں تلے سے زمین نکل گئی۔

 موصولہ اطلاع کے مطابق مئودرواجا تھانے کے پیچھے بہادر گنج کا رہنے والا سنیل جاٹاو ایک پرائیویٹ اسکول میں ٹیچر تھا۔  وہ اپنے گھر پر بچوں کو ٹیوشن بھی پڑھاتا تھا۔  ہر روز کی طرح جب بچے کوچنگ پڑھنے آئے تو گھر کا گیٹ بند تھا۔  کوچنگ پڑھنے آئے بچوں کو کھڑے دیکھ کر گھر والے اور بالائی منزل پر رہنے والے لوگ آگئے۔  کسی ناخوشگوار واقعے کے خدشہ پر جب گھر کا دروازہ توڑ کر دیکھا تو سنیل جاٹاو کی لاش پلاسٹک کی رسی سے چھت کے کنڈے سے لٹکی ہوئی تھی۔  اس کی دونوں بیٹیاں شرشتی (12) اور شگون (8) بستر پر مردہ پڑی تھیں۔

 واقعے کی اطلاع ملتے ہی پولیس موقع پر پہنچ گئی اور لاشوں کو قبضے میں لے کر پوسٹ مارٹم کے لیے بھیج دیا۔  بتایا جا رہا ہے کہ سنیل کی بیوی کی تقریباً 6 ماہ قبل زچگی میں موت ہو گئی تھی۔  اطلاع ملتے ہی ایس پی بھی موقع پر پہنچ گئے اور معاملے کی جانچ کی۔  پولیس کے مطابق متوفی کے کمرے سے خودکشی نوٹ برآمد ہوا ہے۔  جس میں متوفی نے لکھا ہے کہ وہ اپنی بیوی پریتی کے بغیر نہیں رہ سکتا۔  اس لیے پولیس کو شبہ ہے کہ نوجوان نے بیٹیوں کو پہلے قتل کرنے کے بعد خود کو پھانسی لگا لی ہوگی۔  فی الحال پولیس اہل خانہ اور آس پاس کے لوگوں سے بھی پوچھ تاچھ کر رہی ہے۔