وزیر داخلہ امیت شاہ کے سامنے جلائی گئی 30 ہزار کلو منشیات، این سی بی کی بڑی کاروائی
نارکوٹکس کنٹرول بیورو (این سی بی) نے منشیات کے خلاف کاروائی کرتے ہوئے 30 ہزار کلو سے زائد ضبط شدہ منشیات کو تلف کر دیا۔ یہ تمام کاروائی مرکزی وزیر داخلہ امیت شاہ کی نگرانی میں ہوئی۔ منشیات کی یہ بڑی کھیپ 4 مقامات پر تلف کی گئی۔ اس بارے میں مرکزی وزیر داخلہ نے کہا کہ منشیات کی اسمگلنگ سماج کے لیے خطرہ ہے۔ ایسی صورتحال میں کسی بھی ملک کو منشیات کی اسمگلنگ کے خلاف زیرو ٹالرنس ہونا چاہیے۔
چنڈی گڑھ میں، 4 مقامات پر این سی بی کے ذریعے ضبط کی گئی 30,000 کلو سے زیادہ منشیات کو مرکزی وزیر داخلہ کے سامنے ویڈیو کانفرنسنگ کے ذریعے تلف کر دیا گیا۔ اس موقع پر مرکزی وزیر داخلہ امیت شاہ نے کہا کہ ہمیں منشیات کی اسمگلنگ کو روک کر نوجوان نسل کو بچانا ہے۔ بتادیں کہ این سی بی نے یکم جون سے نشہ آور اشیاء کو ٹھکانے لگانے سے متعلق مہم شروع کی تھی۔ 29 جولائی تک 11 ریاستوں میں 51,217 کلوگرام سے زیادہ منشیات کو ضائع کیا جا چکا ہے۔
امیت شاہ نے کہا کہ یہ ایک صحت مند سماج اور خوشحال ملک کے مقصد کو حاصل کرنے کے لیے ضروری ہے۔ یہ سیکیوریٹی کے نقطۂ نظر سے بھی اہم ہے کیونکہ منشیات کی تجارت سے حاصل ہونے والا کالا دھن ملک کے خلاف سرگرمیوں میں استعمال ہوتا ہے۔
کانفرنس کا اہتمام این سی بی نے کیا ہے۔ شاہ نے کہا کہ 2014 میں جب نریندر مودی وزیر اعظم بنے تو حکومت ہند نے منشیات کے حوالے سے زیرو ٹالرنس کی پالیسی اپنائی تھی۔ شاہ نے کہا کہ منشیات کے خلاف تیز رفتار اور متحرک لڑائی کے نتائج سامنے آنا شروع ہو گئے ہیں۔ انہوں نے کہا کہ نشہ نوجوان نسل کو بری طرح متاثر کرتا ہے اور انہیںل دیمک کی طرح نقصان پہنچاتا ہے۔ شاہ نے زور دے کر کہا کہ حکومت اس بحران کو ختم کرنے کے لیے پرعزم ہے۔
وزیر داخلہ نے کہا کہ منشیات کا استعمال نہ صرف اس کا استعمال کرنے والوں پر منفی اثر ڈالتا ہے بلکہ معاشرے، معیشت اور ملک کی سلامتی پر بھی منفی اثرات مرتب کرتا ہے۔ انہوں نے کہا کہ ہمیں اسے مکمل طور پر ختم کرنا ہوگا۔ کانفرنس کے انعقاد کے ساتھ ہی این سی بی نے دہلی، چنئی، گوہاٹی اور کولکتہ میں تقریباً 30,000 کلو گرام نشہ آور اشیاء کو تلف کیا۔
کوئی تبصرے نہیں:
ایک تبصرہ شائع کریں