ادھو حکومت راج ٹھاکرے کو قانونی حراست میں جکڑنے کے لیے تیار،
غیر ضمانتی وارنٹ کے بعد ایک اور ایف آئی آر
اورنگ آباد پولیس نے منگل کو مہاراشٹر نونرمان سینا (ایم این ایس) کے صدر راج ٹھاکرے کے خلاف ایف آئی آر درج کی ہے۔ مہاراشٹر کے ڈی جی پی رجنیش سیٹھ نے خبردار کیا ہے کہ پولیس ریاست میں امن و امان کو خراب کرنے والوں کے خلاف سخت کاروائی کرے گی۔ ممبئی پولیس نے ایم این ایس کے ممبئی دفتر سے لاؤڈ اسپیکر ضبط کر لیے ہیں۔ راج ٹھاکرے کے خلاف اورنگ آباد میں سٹی چوک پولیس اسٹیشن میں مقدمہ درج کیا گیا ہے۔ اس میں کچھ منتظمین کو بھی ملزم بنایا گیا ہے۔ یکم مئی یعنی یوم مہاراشٹر کو راج ٹھاکرے نے اورنگ آباد میں ایک جلسۂ عام سے خطاب کیا تھا۔ مبینہ طور پر اشتعال انگیز تقریر کی گئی۔ انہوں نے مہاراشٹر حکومت کو دھمکی دی تھی کہ 3 مئی تک ریاست کی تمام مساجد سے لاؤڈ اسپیکر ہٹا دیے جائیں، ورنہ ان کی پارٹی کے کارکنان مساجد کے سامنے فل آواز میں ہنومان چالیسہ پڑھیں گے۔ انہوں نے شرد پوار کو بھی نشانہ بنایا اور کہا کہ این سی پی سپریمو ذات پات کی سیاست کرتے ہیں۔
راج ٹھاکرے کی پوری تقریر کی مقامی پولیس نے ویڈیو گرافی کی تھی۔ اسے کئی بار سنا اور پھر قانونی ٹیم کی جانب سے تقریر کو قابل اعتراض قرار دینے کے بعد ان کے خلاف ایف آئی آر بھی درج کرائی گئی۔ مہاراشٹر کی وزارت داخلہ کی طرف سے ریاست میں امن و امان کی بگڑتی ہوئی صورتحال کے پیش نظر ایک جائزہ میٹنگ بھی لی گئی۔ مہاراشٹر کے وزیر داخلہ دلیپ ولسے پاٹل، ڈی جی پی رجنیش سیٹھ اور ممبئی پولیس کمشنر سنجے پانڈے نے بھی منگل کو منعقدہ میٹنگ میں شرکت کی۔
میٹنگ کے بعد ڈی جی پی رجنیش سیٹھ نے پریس کانفرنس بلائی اور بتایا کہ امن و امان کی صورتحال خراب کرنے والوں کے خلاف سخت ترین کاروائی کی جائے گی۔ انہوں نے عوام سے امن برقرار رکھنے کی اپیل کی۔ ساتھ ہی یہ بھی کہا کہ مہاراشٹر پولیس کسی بھی امن و امان کی صورتحال سے نمٹنے کی صلاحیت رکھتی ہے۔ ریاست میں ایس آر پی ایف اور ہوم گارڈز کو تعینات کیا گیا ہے۔
ڈی جی پی نے کہا کہ ریاست بھر میں 13 ہزار سے زیادہ لوگوں کو نوٹس جاری کیے گئے ہیں۔ ممبئی میں ایم این ایس کے 100 سے زیادہ لوگوں کو سی آر پی سی کی دفعہ 149 کے تحت نوٹس بھیجے گئے ہیں۔ ان میں نتن سردیسائی اور بالا ناندگاؤںکر کے نام نمایاں ہیں۔ ممبئی پولیس نے منگل کو پارٹی کے چاندیولی دفتر پر چھاپہ مارا۔ وہاں سے لاؤڈ اسپیکرز کو ضبط کر لیا گیا اور پارٹی کی یونٹ کے سربراہ مہیندر بھانوشالی سمیت کئی لوگوں کو بھی حراست میں لے لیا گیا۔
اورنگ آباد میں درج ایف آئی آر سے نہ صرف راج ٹھاکرے کی مشکلات میں اضافہ ہوا ہے۔ سانگلی کی عدالت نے راج ٹھاکرے کے خلاف ناقابل ضمانت وارنٹ بھی جاری کیا ہے اور ممبئی پولیس کمشنر سے اس پر کاروائی کرنے کو کہا ہے۔ معاملہ سال 2008 کا ہے۔ بیڑ کے پرلی علاقے میں ایم این ایس کارکنوں نے اسٹیٹ ٹرانسپورٹ کارپوریشن کی بسوں پر پتھراؤ کیا۔ اس معاملے میں درج مقدمے میں راج ٹھاکرے کو عدالت میں حاضر ہونے کو کہا گیا تھا۔ اس کے بعد راج ٹھاکرے ایک بار بھی نظر نہیں آئے۔ ضمانت کے باوجود مسلسل تاریخوں پر عدم پیشی پر عدالت نے ان کے خلاف ناقابل ضمانت وارنٹ جاری کیا ہے۔
کوئی تبصرے نہیں:
ایک تبصرہ شائع کریں