بی جے پی ایم پی برج بھوشن سنگھ کا چیلنج؛: راج ٹھاکرے کو ایودھیا میں داخل ہونے نہیں دونگا، رکھی یہ شرط

 

بی جے پی ایم پی برج بھوشن سنگھ کا چیلنج:

راج ٹھاکرے کو ایودھیا میں داخل ہونے نہیں دونگا، رکھی یہ شرط  

 اتر پردیش میں، بھارتیہ جنتا پارٹی (بی جے پی) کے رکن پارلیمنٹ برج بھوشن شرن سنگھ نے اعلان کیا ہے کہ مہاراشٹر نو نرمان سینا (ایم این ایس) کے سربراہ راج ٹھاکرے کو ایودھیا میں داخل ہونے کی اجازت نہیں دی جائے گی۔  انہوں نے کہا ہے کہ ایودھیا آنے سے پہلے راج ٹھاکرے کو  اتر بھارتیوں سے ہاتھ جوڑ کر معافی مانگنی چاہیے۔  یہی نہیں، انہوں نے وزیر اعلیٰ یوگی آدتیہ ناتھ کو بھی مشورہ دیا ہے کہ جب تک راج ٹھاکرے معافی نہیں مانگتے، وہ ان سے ملاقات نہ کریں۔  رکن پارلیمنٹ نے یہ بھی کہا کہ ٹھاکرے خاندان کا رام مندر تحریک سے کوئی لینا دینا نہیں ہے۔  راج ٹھاکرے رام للا کے دیدار کے لیے 5 جون کو ایودھیا آئیں گے۔

 قیصر گنج سے بی جے پی کے رکن پارلیمنٹ برج بھوشن شرن سنگھ نے جمعرات کو راج ٹھاکرے پر سلسلہ وار ٹوئیٹس میں حملہ کیا اور معافی مانگنے کا مطالبہ کرتے ہوئے الزام لگایا کہ وہ  اتر بھارتیوں کی توہین کر رہے ہیں۔  انہوں نے ٹوئیٹ کیا، ’’اتر بھارتیوں کی تذلیل کرنے والے راج ٹھاکرے کو ایودھیا کی سرحد میں گھسنے نہیں ہونے دونگا۔  راج ٹھاکرے ایودھیا آنے سے پہلے تمام اتر بھارتیوں سے ہاتھ جوڑ کر معافی مانگیں۔

 برج بھوشن شرن سنگھ نے بھی وزیر اعلیٰ یوگی آدتیہ ناتھ کو ٹھاکرے سے ملاقات نہ کرنے کا مشورہ دیتے ہوئے لکھا، "میری درخواست ہے کہ وزیر اعلیٰ یوگی آدتیہ ناتھ جی کو راج ٹھاکرے سے اس وقت تک نہیں ملنا چاہیے جب تک راج ٹھاکرے اتر بھارتیوں سے عوامی طور پر معافی نہیں مانگتے۔ رام مندر آندولن میں ٹھاکرے خاندان کے کردار سے انکار کرتے ہوئے انہوں نے کہا کہ رام مندر تحریک سے لے کر مندر کی تعمیر تک راشٹریہ سویم سیوک سنگھ، وشو ہندو پریشد اور عام آدمی کا کردار رہا ہے۔  ٹھاکرے خاندان کا اس سے کوئی لینا دینا نہیں ہے۔

بھارتیہ  جنتا پارٹی کے  ایم پی نے راج ٹھاکرے کے خلاف ایسے وقت میں محاذ کھولا ہے جب ایم این ایس سربراہ نے حال ہی میں مذہبی مقامات سے لاؤڈ اسپیکر ہٹانے پر یوگی حکومت کی تعریف کی ہے۔  مہاراشٹر میں لاؤڈ اسپیکر تنازعہ کو جنم دینے والے راج ٹھاکرے کی بی جے پی سے قربت بڑھنے کی بات چل رہی ہے۔  تاہم، اتر بھارتیوں کے حوالے سے ایم این ایس اور راج ٹھاکرے کا موقف سب کو معلوم ہے، جس کی وجہ سے بی جے پی انہیں ساتھ لینے میں ہچکچا رہی ہے۔  بی جے پی کو خدشہ ہے کہ مہاراشٹر میں راج ٹھاکرے کے ساتھ دوستی کا اتر بھارتیوں  میں نقصان ہوسکتا ہے۔  راج ٹھاکرے یوپی اور بہار کے لوگوں پر مہاراشٹر جاکر لوگوں کی نوکریاں چھیننے اور مجرمانہ واقعات کو انجام دینے کا الزام لگاتے رہے ہیں۔