نونیت رانا نئے جھمیلے میں : پولیس نے ان پر اور ان کے شوہر روی رانا سمیت 15 حامیوں کے خلاف بھی مقدمہ درج کر لیا۔
امراوتی : آزاد رکن پارلیمنٹ نونیت رانا اور ان کے ایم ایل اے شوہر روی رانا کے ساتھ ان کے تقریباً 15 حامیوں کے خلاف مقدمہ درج کیا گیا ہے۔ ایک پولیس اہلکار نے اتوار کو بتایا کہ یہ کاروائی مبینہ طور پر قوانین کی خلاف ورزی کرنے اور نونیت رانا اور روی رانا کے استقبالیہ پروگرام کے دوران ٹریفک میں رکاوٹ ڈالنے پر کی گئی ہے۔
واضح رہے کہ رانا جوڑے کو 23 اپریل کو گرفتار کیا گیا تھا۔ انہوں نے مہاراشٹر کے وزیر اعلیٰ ادھو ٹھاکرے کی نجی رہائش گاہ ماتوشری کے سامنے ہنومان چالیسہ پڑھنے کا اعلان کیا تھا۔ اس کی وجہ سے شیوسینا کے کارکنوں کے ساتھ کشیدگی پیدا ہوگئی۔ انہیں ممبئی کی خصوصی عدالت نے 4 مئی کو ضمانت دی تھی۔
ایم پی نونیت رانا اور ان کے شوہر، بڈنیرا سے ایم ایل اے، کا 36 دنوں کے بعد شہر واپسی پر ہفتہ کی رات دیر گئے حامیوں نے شاندار استقبال کیا۔ مقامی پولیس حکام نے بتایا کہ استقبالیہ جلوس نے کئی مقامات پر ٹریفک میں خلل ڈالا۔ جوڑے کی طرف سے کی گئی آرتی میں رات 10 بجے کے بعد بھی لاؤڈ اسپیکر کا استعمال کیا گیا۔
امراوتی پولیس کمشنر آرتی سنگھ نے کہا کہ رانا جوڑے کے خلاف راجا پیٹھ پولیس اسٹیشن میں آئی پی سی، مہاراشٹر پولیس ایکٹ اور ماحولیاتی تحفظ ایکٹ کی دفعات کے تحت مقدمہ درج کیا گیا ہے۔ ایک ٹی وی چینل سے بات کرتے ہوئے روی رانا نے امن و امان کی خلاف ورزی کی تردید کی ہے۔
روی رانا نے کہا کہ انہوں نے اور ان کی اہلیہ نے ہفتہ کو ناگپور اور امراوتی میں ان کے حامیوں کی طرف سے منعقدہ استقبالیہ پروگرام میں شرکت کرتے ہوئے کسی اصول کی خلاف ورزی نہیں کی۔ انہوں نے وزیر اعلی ادھو ٹھاکرے پر بھی حملہ کیا۔
انہوں نے (روی رانا) کہا کہ پچھلی بی جے پی حکومت کے دوران ودربھ میں قائم 75 فیصد صنعتیں بند ہو چکی ہیں۔ روی رانا نے یہ بھی الزام لگایا کہ ادھو ٹھاکرے حکومت ریاست میں لوڈ شیڈنگ کو روکنے میں ناکام رہی ہے۔
کوئی تبصرے نہیں:
ایک تبصرہ شائع کریں