کہیں یہ مہاراشٹر کو فساد کی آگ میں جھونکنے کی سازش تو نہیں؟
دھولیہ کے بعد نانڈیڑ میں تلواروں کا ذخیرہ ضبط ۔
نانڈیڑ: مہاراشٹر میں ایک طرف شیوسینا اور بی جے پی کے درمیان زبردست بیان بازی جاری ہے۔ لاؤڈ اسپیکر ہندوتوا اور ہنومان چالیسہ کے معاملے پر دونوں طرف سے الزام تراشی اور جوابی الزامات کا دور شروع ہے۔ ساتھ ہی ایک کے بعد ایک تلواریں پکڑے جانے سے یہ سوال بھی اٹھنے لگا ہے کہ کیا اب مہاراشٹر میں فساد کی کوئی سازش تو نہیں؟ اس کے پیچھے بہت سی وجوہات ہیں۔ پہلا واقعہ مہاراشٹر کے دھولیہ شہر کا ہے، جہاں سے کچھ دن پہلے مقامی پولیس نے تقریباً 90 تلواریں ضبط کی تھیں۔ ساتھ ہی نانڈیڑ شہر میں 25 تلواریں بھی پکڑی گئی ہیں۔ اتنی بڑی تعداد میں تلواریں پکڑے جانے سے کئی سوالات اٹھ رہے ہیں۔ سوال یہ ہے کہ کیا مجرمانہ نوعیت کے لوگ آنے والے دنوں میں ان تلواروں کے ذریعے تشدد پھیلانے کا منصوبہ بنا رہے تھے؟ یا ان کے دماغ میں کچھ اور چل رہا تھا؟ فی الحال مہاراشٹر پولس ان تمام معاملات کی تحقیقات کر رہی ہے۔
مہاراشٹر کے دھولیہ شہر کے بعد، مقامی پولیس نے ریاست کے نانڈیڑ ضلع میں شیواجی نگر تھانے کے علاقے کے قریب سے 25 تلواروں کا ذخیرہ ضبط کیا ہے۔ پولیس نے اس معاملے میں ایک ملزم کو گرفتار بھی کیا ہے۔ معلومات کے مطابق تلواروں کے اس ذخیرے کو آٹو رکشا میں چھپا کر لے جایا جا رہا تھا۔ پولیس نے اس معاملے میں دو مشتبہ افراد کو گرفتار کیا ہے۔ گرفتار ہونے والوں کے نام ہرپریت سنگھ جسپال سنگھ (40) اور آکاش گھوٹکواڈ ہیں۔ اس سے قبل دھولیہ میں بھی پولیس نے تقریباً 89 تلواریں اور ایک خنجر ضبط کیا تھا۔ پولیس نے اس معاملے میں چار لوگوں کو گرفتار کیا تھا۔
اتنی بڑی تعداد میں تلواریں برآمد ہونے کے بعد مہاراشٹر حکومت اور بی جے پی کے درمیان لفظی جنگ بھی شروع ہو گئی ہے۔ اس معاملے میں بی جے پی ایم ایل اے رام کدم نے شیوسینا پر حملہ کرتے ہوئے سنگین سوالات اٹھائے ہیں۔ انہوں نے کہا کہ آخر مہاراشٹر میں کون فسادات کروانا چاہتا ہے؟ جہاں کانگریس کی حکومت ہے اسی راجستھان سے 90 ہتھیار جالنہ جا رہے تھے ۔ مہاراشٹر کے دھولیہ سے برآمد ہونے والے ہتھیاروں کے ذخیرے کے پیچھے کس کی سازش ہے۔ کیا کانگریس اس سازش میں ملوث ہے؟ انہوں نے یہ سوال بھی اٹھایا کہ کیا ٹھاکرے حکومت اس کی تہہ تک جاکر اس کی تحقیقات کرے گی؟
مساجد سے لاؤڈ اسپیکر ہٹانے کا مسئلہ مہاراشٹر سے اس وقت کھڑا ہوا، جب ایم این ایس لیڈر راج ٹھاکرے نے ادھو ٹھاکرے حکومت کو الٹی میٹم دیا۔ تب سے اس پر سیاست شروع ہوئی اور سنجے راؤت لگاتار بی جے پی کو نشانہ بنا رہے ہیں۔ انہوں نے پہلے کہا تھا کہ بی جے پی اپنی خود غرضی کے لیے دو بڑے شہروں کا ماحول خراب کر رہی ہے۔
سنجے راؤت نے کہا تھا کہ بی جے پی دو بڑے شہروں میں فسادات کا ماحول بنا رہی ہے۔ انہوں نے اسے بدقسمتی قرار دیا۔ انہوں نے کہا تھا کہ دہلی میں ایسا کیا جا رہا ہے کیونکہ بلدیاتی انتخابات آنے والے ہیں۔ ساتھ ہی ممبئی میں بی ایم سی انتخابات کی وجہ سے یہ سیاست کی جارہی ہے تاکہ لوگوں کی توجہ اصل مسائل سے ہٹائی جاسکے۔
کوئی تبصرے نہیں:
ایک تبصرہ شائع کریں