دہلی میں کورونا وائرس کی تمام پابندیاں ختم، یکم اپریل سے تمام اسکول کھلیں گے

 نئی دہلی، 25 فروری: قومی دار الحکومت دہلی میں کورونا وائرس سے متعلق تقریباً تمام پابندیاں ختم کر دی گئی ہیں دہلی کے وزیر اعلی اروند کیجریوال نے جمعہ کے روز کہا کہ کورونا وائرس کے متاثرین میں مسلسل کمی اور لوگوں کو درپیش مسائل کے پیش نظر ڈی ڈی ایم اے نے یہاں لاگو تمام پابندیاں ختم کر دی ہیں انہوں نے کہا کہ یکم اپریل سے تمام اسکول کھل جائیں گے عوامی مقامات پر ماسک لازمی رہے گا اور خلاف ورزی کرنے والوں کو پانچ سو روپے جرمانہ کیا جائے گا پہلے جرمانے کی یہ رقم دو ہزار تھی کورونا پروٹوکول کے ساتھ تمام پابندیاں ہٹا دی گئی ہیں اور حکومت اس پر سختی سے نظر رکھے گی۔

ڈی ڈی ایم اے کے اجلاس میں پیر کے روز سے رات کا کرفیو ہٹانے کا فیصلہ کیا گیا ہے۔ اب مسافر میٹرو اور بسوں میں کھڑے ہو کر سفر کر سکیں گے۔ وزیر اعلیٰ نے اپیل کی ہے کہ ہر کوئی کووڈ سے متعلق ضروری احتیاطی تدابیر پر عمل کرے۔ انہوں نے کہا کہ دہلی حکومت اس پر سختی سے نظر رکھے گی۔

واضح رہے کہ گزشتہ 24 گھنٹے میں کورونا وائرس کے 556 نئے متاثرین کی تصدیق ہوئی ہے۔ اس کے ساتھ ہی انفیکشن کی شرح 1.10 فیصد رہی ہے۔ جمعرات کے روز دہلی میں 50,591 نمونوں کی جانچ کی گئی اور ان میں سے 556 نمونے مثبت پائے گئے۔ اس دوران چھ مریضوں کی موت ہو ئی ہے۔