شاہ نے ترنمول کانگریس کے وفد کو تری پورہ تشدد کا نوٹس لینے کا یقین دلایا.
نئی دہلی : مرکزی وزیر داخلہ امت شاہ نے ترنمول کانگریس کے اراکین پارلیمنٹ کے وفد کو تریپورہ میں سیاسی تشدد کے واقعات کا نوٹس لینے کی یقین دہانی کرائی ہے ترنمول ممبران پارلیمنٹ کے ایک وفد نے پیر کو مسٹر شاہ سے تریپورہ میں سیاسی تشدد اور ترنمول کے نوجوان لیڈر سیانی گھوش کی گرفتاری کے معاملے پر ملاقات کی اور اس کا نوٹس لینے کے لئے انہیں ایک میمورنڈم پیش کیا ترنمول ایم پی کلیان بنرجی نے مسٹر شاہ سے ملاقات کے بعد نامہ نگاروں کو بتایا کہ مسٹر شاہ نے انہیں بتایا کہ انہوں نے اتوار کو تریپورہ کے وزیر اعلیٰ وپلو کمار دیو سے بات کی ہے اور سیاسی تشدد کے واقعات کی تفصیلات مانگی ہیں۔
مسٹر بنرجی نے کہا کہ مسٹر شاہ نے وزیر اعلی مسٹر دیو سے ترنمول لیڈر محترمہ گھوش پر پولیس کی بربریت اور ان کی گرفتاری کے معاملے پر بھی رپورٹ طلب کی ہے۔
ترنمول کے ایم پی سوگت رائے نے کہا، ’’ہم نے وزیر داخلہ کو تفصیل سے بتایا کہ کس طرح تریپورہ میں کارپوریشن انتخابات کے دوران سیاسی نفرت کی وجہ سے ہمارے لیڈروں اور کارکنوں پر حملہ اور گرفتار کیا جا رہا ہے۔ مسٹر شاہ نے تشدد کے واقعات کو روکنے کی یقین دہانی کرائی ہے۔‘‘
صبح سویرے ترنمول کے 16 ارکان پارلیمنٹ نے یہاں وزارت داخلہ کے باہر تریپورہ تشدد اور پولیس کی مبینہ بربریت اور محترمہ گھوش پر گرفتاری کے خلاف دھرنا دیا۔
ترنمول کے ارکان پارلیمنٹ نے وزیر اعظم نریندر مودی اور مسٹر شاہ کے خلاف نعرے بھی لگائے اور مسٹر شاہ سے ملاقات کا وقت مانگا۔
ترنمول لیڈر مسٹر رائے نے یو این آئی کو بتایا، ’’ ہم چاہتے ہیں کہ وزیر داخلہ ہماری بات سنیں۔ مسٹر شاہ اور مسٹر مودی دونوں کو تریپورہ میں تشدد کا جواب دینا چاہئے۔
مسٹر رائے نے تریپورہ میں ترنمول کی نوجوان لیڈر محترمہ گھوش کی گرفتاری کی مذمت کرتے ہوئے الزام لگایا، ’’بھارتیہ جنتا پارٹی (بی جے پی) کی حکومت والے تریپورہ میں افراتفری کی صورتحال ہے۔ ریاست میں بلدیاتی انتخابات کے دوران بی جے پی حکومت سیاسی دشمنی کی وجہ سے اپوزیشن پارٹیوں کے لیڈروں اور کارکنوں کو نشانہ بنا رہی ہے۔‘‘
قابل ذکر ہے کہ تریپورہ پولیس نے اتوار کو محترمہ گھوش کو قتل کی کوشش کے الزام میں گرفتار کیا تھا۔ محترمہ گھوش پر ہفتہ کی رات ریاست کے وزیر اعلی مسٹر دیو کی میٹنگ میں مبینہ طور پر خلل ڈالنے کا الزام ہے۔
محترمہ گھوش کی گرفتاری کے بعد سے بی جے پی اور ترنمول کے درمیان کشمکش جاری ہے۔ ترنمول کا الزام ہے کہ بی جے پی کارپوریشن انتخابات کے دوران تریپورہ میں ان کے بڑے لیڈروں کی ریلی کی اجازت نہیں دے رہی ہے۔
کوئی تبصرے نہیں:
ایک تبصرہ شائع کریں