اردو صحافت فرقہ وارانہ ہم آہنگی کی بہترین مثال ہے

اردو صحافت فرقہ وارانہ ہم آہنگی کی بہترین مثال ہے

دہلی یونین آف جرنلسٹس کی تہنیتی تقریب میں سینئر صحافی معصوم مرادآبادی کا اظہارخیال

نئی دہلی، 21 ستمبر (یواین آئی)اردوصحافت ملک میں فرقہ وارانہ ہم آہنگی کی بہترین مثال ہے اور اس نے ملک کی آزادی کے لیے ناقابل فراموش قربانیاں دی ہے ان خیالات کا اظہار گزشتہ روز یہاں سینئر صحافی معصوم مرادآبادی نے ایک تہنیتی تقریب کے دوران کیا اردوصحافت اور جنگ آزادی 1857کے موضوع پر حال ہی میں ان کی ایک ہندی کتاب منظر عام پر آئی ہے جس میں اردو صحافیوں کی قربانیوں کی ولولہ انگیز داستان ہے۔دہلی یونین آف جرنلسٹس اور نیشنل الائنس آف جرنلسٹس کی طرف سے منعقدہ اس تقریب میں معصوم مرادآبادی نے کہا کہ اب سے دوسو سال پہلے اردو کا پہلا اخبار ’جام جہاں نما‘ پنڈت ہری ہردت اور پنڈت سداسکھ نے کلکتہ سے شائع کیا تھا۔آج دوسوسال بعد جب ہم یہ دیکھتے ہیں کہ شمالی ہند کے دوبڑے اخباروں کے مالکان کے نام سنجے گپتا اور سبرتو رائے ہیں تو ہمیں خوشی ہوتی ہے کہ اردو صحافت آج بھی اپنے محور پر قایم ہے۔
اس موقع پر ڈی یو جے کے صدر ایس کے پانڈے نے معصوم مرادآبادی کا استقبال کرتے ہوئے کہا یونین کے ساتھ ان کی چالیس سالہ سرگرم وابستگی کا ذکر کیا۔انھوں نے کہا کہ معصوم مرادآبادی نے اردوصحافت کی ترقی کے لیے گراں قدر 

قدر خدمات انجام دی ہیں اور اب وہ اپنی تحقیق وجستجو سے جنگ آزادی میں اردو صحافیوں کی ناقابل فراموش قربانیوں کو منظر عام پر لارہے ہیں۔ ان کی تازہ ہندی کتاب اسی سلسلے کی کڑی ہے، جس میں انھوں نے پہلے شہید صحافی مولوی محمد باقر پر خصوصی مواد پیش کیا ہے۔مسٹر پانڈے نے کہا کہ معصوم زمین سے جڑے ہوئے ایسے صحافی ہیں، جنھوں نے بہت نیچے سے اپنا سفر شروع کرکے اردو صحافیوں کی صف اوّل میں جگہ بنالی ہے۔ یہاں تک پہنچنے کے لیے انھوں نے بڑی محنت، جدوجہد اور دیانت داری سے کام لیا ہے۔
ڈی یو جے کی خزانچی مرنال ولاری نے اس موقع پر معصوم مرادآبادی کی کتاب پر سیر حاصل گفتگو کرتے ہوئے کہا کہ معصوم مرادآبادی نے ہندی قارئین کو اردو صحافت کے ایک ایسے بلند کردار سے روبرو کیا ہے جس سے اب تک ہندی والے ناآشنا تھے۔امید ہے کہ ہندی جگت اس کتاب سے بہت فائدہ اٹھائے گا۔ریڈیو جرمنی کی اردونشریات کے نمائندے جاوید اختر نے اس موقع پر کہا کہ معصوم مرادآبادی اپنے تحقیقی رویوں، سخت محنت اور پیشہ وارانہ دیانت داری کے لیے جانے جاتے ہیں اور ان ہی خوبیوں نے انھیں اردوصحافت میں معتبر شناخت عطا کی ہے۔اس موقع پر سینئر صحافی محمداحمد کاظمی نے کہا کہ معصوم مرادآبادی کی یہ کتاب جنگ آزادی میں مسلمانوں کی لازوال قربانیوں کی ایک اہم دستاویزہے اور ڈی یو جے نے ان کے اعزاز میں یہ محفل منعقد کرکے بڑا کام کیا ہے۔اس موقع پر یونین کے صدر ایس کے پانڈے نے ’نئی دنیا‘ کے ایڈیٹر شاہد صدیقی اور’انقلاب‘(نارتھ) کے ایڈیٹر ایم ودود ساجد کا ایک پیغام بھی پڑھ کر سنایا۔تہنیتی تقریب میں ہندی، انگریزی اور اردو کے صحافی کثیر تعداد میں موجود تھے۔آخر میں یونین کی جنرل سیکریٹری سجاتا مدھوک نے حاضرین کا شکریہ ادا کیا۔اس موقع پر صاحب اعزاز کو شال اور گلدستہ پیش کرکے ان کی حوصلہ افزائی کی گئی۔