کیپٹن نے نومنتخب وزیراعلیٰ کو مبارکباد دے کر اپنا داؤ چل دیا. کسان کارڈ کھیل کر کانگریس کو پویلین کا راستہ دکھائیں گے سابق وزیراعلیٰ.
چنڈی گڑھ : سابق وزیراعلیٰ کیپٹن امریندر سنگھ نے کانگریس کی طرف سے پنجاب میں نئے وزیراعلیٰ کے منتخب ہوتے ہی اپنے تیور دکھانا شروع کر دیئے ہیں ۔ ایک طرف انہوں نے نو منتخب وزیر اعلیٰ چرنجیت سنگھ چننی کو مبارکباد دی ہے جبکہ دوسری طرف انہوں نے کسان کارڈ بھی کھیل دیا ہے۔ کیپٹن امریندر سنگھ نے اتوار کی شام کہا کہ میں ان 150 کسانوں کے خاندانوں کو جاب کارڈ نہیں دے سکا جنہوں نے زرعی قوانین کے خلاف احتجاج کے دوران اپنی جانیں گنوائیں۔ مجھے اس بات کا بہت دکھ ہے۔ انہوں نے کہا کہ مجھے امید ہے کہ چرنجیت سنگھ چننی اس کام کو جلد از جلد مکمل کریں گے۔ اس کے ساتھ انہوں نے کہا کہ میں کسانوں کی انصاف کی لڑائی میں ان کے ساتھ کھڑا رہوں گا۔
کیپٹن امریندر سنگھ کے میڈیا ایڈوائزر رویندر ٹھکرال نے ان کے حوالے سے ٹوئیٹ کیا ہے۔ اس سے قبل کیپٹن امریندر سنگھ نے چننی کو وزیراعلیٰ منتخب ہونے پر مبارکباد دی تھی۔ چننی کو مبارکباد دیتے ہوئے سابق وزیراعلیٰ نے کہا کہ مجھے امید ہے کہ وہ پنجاب کو سیکیورٹی دے سکیں گے۔ سینئر لیڈر نے کہا ، 'میری نیک خواہشات چرنجیت سنگھ چننی کے ساتھ ہیں۔ مجھے امید ہے کہ وہ پنجاب جیسی سرحدی ریاست کو محفوظ رکھنے میں کامیاب رہیں گے ۔ اس کے علاوہ ، وہ سیکیورٹی کے نئے خطرات کے درمیان لوگوں کو محفوظ رکھنے کے قابل ہوں گے۔ انہوں نے کہا کہ پنجاب میں سرحد پار سے ہمیشہ سے سیکیورٹی خطرہ رہا ہے۔
آپ کو بتاتے چلیں کہ پنجاب کے سینئر لیڈر کیپٹن امریندر سنگھ نے ہفتہ کو وزیراعلیٰ کے عہدے سے استعفیٰ دے دیا تھا۔ اس کے ساتھ ہی پارٹی ہائی کمان کو نشانہ بناتے ہوئے انہوں نے کہا تھا کہ شاید ان کو مجھ پر سے بھروسہ نہیں ہیں۔ کیپٹن امریندر سنگھ نے کہا کہ جس انداز سے ایم ایل اے کی میٹنگ گزشتہ دو ماہ میں تین بار بلائی گئی ہے اس سے میں نے اپنی تضحیک محسوس کی ہے ۔ یہی نہیں ، کیپٹن امریندر سنگھ نے کانگریس چھوڑنے اور ایک مختلف راستہ اختیار کرنے کا بھی عندیہ ظاہر کیا تھا۔ استعفیٰ کے بعد انہوں نے کہا کہ میرے لیے مستقبل کے آپشن کھلے ہیں۔ سیاست حکمت عملی کا کھیل نہیں ہے بلکہ ایک موونگ گیم ہے۔
کوئی تبصرے نہیں:
ایک تبصرہ شائع کریں