ممبرا کے پرائم اسپتال میں کل رات بھیانک آگ لگنے سے  4 مریض ہلاک  

ممبئی سے ملحق تھانہ کے ممبرا  علاقے میں واقع پرائم اسپتال میں کل رات شدید آگ  لگنے کی وجہ سے چار مریض  ہلاک ہوگئے۔ بتایا جارہا ہے کہ تھانہ ممبرا کے علاقے میں واقع پرائم اسپتال کے آئی سی یو میں آگ لگی تھی ۔ جس کے بعد افراتفری پھیل گئی۔ اب تک ، آئی سی یو میں داخل 4 مریض آتشزدگی کے باعث فوت ہوگئے ہیں۔ بتایا جارہا  ہے کہ واقعے کے وقت آئی سی یو میں کل 8 مریض داخل تھے ۔ فی الحال ، آگ پر قابو پالیا گیا ہے اور دیگر مریضوں کو قریبی بلال اسپتال میں منتقل کردیا گیا ہے ۔

موصولہ اطلاع کے مطابق دیر  رات تین بجے کے بعد اسپتال کے آئی سی یو میں آگ لگنے لگی۔  حادثے کی اطلاع ملنے کے بعد فائر بریگیڈ اور ریسکیو ٹیم موقع پر پہنچ گئی ۔ جس کے بعد اسپتال میں داخل مریضوں کو بحفاظت نکالا گیا۔ آئی سی یو میں داخل مریضوں کو دوسرے اسپتال میں داخل کرنے کے دوران 4 مریض دم توڑ گئے۔ اسپتال میں آگ لگنے کی وجہ کا بھی پتہ نہیں چل سکا ہے۔ اگرچہ اس کو شارٹ سرکٹ سے لگی آگ قرار دیا جارہا ہے۔ علاقے کے ایم ایل اے اور وزیر جتیندر اوہاڑ نے کل رات جائے وقوع کا دورہ کیا۔ انہوں نے کہا کہ وزیر اعلی کے حکم کے بعد اس حادثے میں جاں بحق ہونے والوں کے لواحقین کو پانچ لاکھ روپے کی مالی امداد دی جائے گی۔ جبکہ حادثے میں زخمی ہونے والے مریضوں کو ایک لاکھ روپے دیئے جائے گے ۔