پہلے نام اور اب طلبہ کی احتجاجی تحریک سے سرخیوں میں آئے پٹنہ کے خان سر،  

 بہار پولیس نے ریلوے بھرتی امتحانات کے نتائج پر پرتشدد مظاہروں کے سلسلے میں یوٹیوبر خان سر اور دیگر کے خلاف پٹنہ میں ایف آئی آر درج کی ہے۔  مسابقتی امتحانات کے لیے کوچنگ کلاس لینے والے خان سر پر پیر کے روز احتجاج کے دوران تشدد بھڑکانے کا الزام ہے۔ یہ ایف آئی آر پٹنہ میں پیر اور منگل کو حراست میں لیے گئے مشتعل طلباء کے بیانات کی بنیاد پر درج کی گئی ہے۔  انہوں نے مبینہ طور پر کہا کہ انہیں ایک ویڈیو کے بعد تشدد میں ملوث ہونے کی ترغیب ملی تھی جس میں خان سر نے مبینہ طور پر طلباء کو RRB NTPC کے امتحانات منسوخ نہ ہونے پر سڑکوں پر احتجاج کرنے کے لئے اکسایا تھا۔  یہ ویڈیو سوشل میڈیا پر وائرل ہو گئی تھی۔

 میڈیا رپورٹس کے مطابق، ایف آئی آر درج ہونے سے پہلے، خان سر  نے کہا کہ اگر ان کا تشدد میں کوئی کردار ہے تو انہیں گرفتار کر لیا جائے۔  انہوں نے تشدد کے لیے ریلوے ریکروٹمنٹ بورڈ (RRB) کو ذمہ دار ٹھہرایا اور کہا کہ انہوں نے انٹرمیڈیٹ اور گریجویٹ طلباء کو بھی مساوی نتائج دیئے۔  انہوں نے کہا کہ اس سے صرف گریجویٹ طلباء ہی مستفید ہوئے ہیں۔  انہوں نے پرتشدد رخ اختیار کرنے والے احتجاج کے لیے RRBs کو مورد الزام ٹھہرایا۔

 پٹنہ والے خان سر کا ویڈیو کافی وائرل ہو رہا ہے۔  وہ یوٹیوب کی دنیا کی مشہور شخصیات میں سے ایک ہیں۔  وہ خان جی ایس ریسرچ سینٹر کے نام سے ایک یوٹیوب چینل چلاتے ہیں۔  یہاں ان کے تقریباً 1.45 کروڑ فالوورز ہیں۔  انہیں  کرنٹ افیئرز اور جی ایس کو دیسی انداز میں سمجھانے میں مہارت حاصل  ہے۔  یوٹیوب پر ان کی ویڈیوز کے شائقین لاکھوں کی تعداد میں ہے۔

 

 خان سر نے کبھی اپنا اصل نام ظاہر نہیں کیا۔  اس سے قبل کچھ لوگوں نے سوشل میڈیا پر دعویٰ کیا تھا کہ ان کا نام امیت سنگھ ہے۔  تاہم کچھ لوگوں نے یہ بھی دعویٰ کیا کہ ان کا نام فیصل خان ہے اور ان کا تعلق اتر پردیش کے گورکھپور سے ہے۔  جب خان سر سے نام واضح کرنے کو کہا گیا تو انہوں نے کہا کہ جس کوچنگ انسٹی ٹیوٹ میں وہ پڑھا رہے تھے انہوں نے ان سے کہا تھا کہ وہ اپنا اصل نام ظاہر نہ کریں اور نہ ہی اپنا ذاتی نمبر بتائیں۔  انہوں نے کہا کہ کچھ طلباء انہیں خان سر کہہ کر مخاطب کرنے لگے۔  جب وقت آئے گا تب سب کو میرا اصل نام معلوم ہو جائے گا۔

 جن ادھیکار پارٹی کے لیڈر پپو یادو خان ​​سر  کی حمایت میں آئے اور کہا کہ طلبہ اور اساتذہ کو ہراساں کرنا بند ہونا چاہیے۔  انہوں نے کہا کہ یہ بدقسمتی کی بات ہے کہ اساتذہ کے خلاف آر آر ٹی -این ٹی پی سی ایجی ٹیشن کیس میں مقدمہ چلایا جا رہا ہے۔  انہوں نے کہا کہ حکومت نے طلباء کے مستقبل سے کھلواڑ کیا اس لئے طلباء اب سڑکوں پر نکل آئے ہیں۔  اگر آپ نے  اپنی ذمہ داری پوری کی ہوتی تو یہ نوبت نہیں آتی ۔  اس لیے میں کہہ رہا ہوں - اساتذہ اور طلبہ کو ہراساں کرنا بند کرو۔  اگر گرفتار کرنا چاہتے ہیں تو پہلے مجھے گرفتار کرو۔

 بہار کے سابق وزیر اعلیٰ جتین رام مانجھی نے بھی خان سر کی حمایت کی ہے۔  ’’آئین کے تحت کسی کو تشدد اور تخریب کاری کا حق نہیں ہے۔  اب وقت آگیا ہے کہ حکومت روزگار کی بات کرے ورنہ حالات مزید خراب ہوسکتے ہیں۔  خان سر سمیت اساتذہ کے خلاف مقدمات احتجاج میں تشدد کو مزید بھڑکا سکتے ہیں۔

 ان کے خلاف تشدد بھڑکانے کے الزامات کے بعد، خان سر نے مبینہ طور پر ایک ویڈیو جاری کیا جس میں انہوں نے طلباء سے اپیل کی کہ وہ اپنی تحریک کو پرامن رکھیں۔  انہوں نے کہا کہ اگر وہ تشدد کی طرف مائل ہوئے تو کوئی بھی ان کی حمایت نہیں کرے گا۔