پروین شاکر کی غزلیں

 

کچھ تو ہوا بھی سرد تھی کچھ تھا ترا خیال بھی

دل کو خوشی کے ساتھ ساتھ ہوتا رہا ملال بھی

بات وہ آدھی رات کی رات وہ پورے چاند کی

چاند بھی عین چیت کا اس پہ ترا جمال بھی

سب سے نظر بچا کے وہ مجھ کو کچھ ایسے دیکھتا

ایک دفعہ تو رک گئی گردش ماہ و سال بھی

دل تو چمک سکے گا کیا پھر بھی تراش کے دیکھ لیں

شیشہ گران شہر کے ہاتھ کا یہ کمال بھی

اس کو نہ پا سکے تھے جب دل کا عجیب حال تھا

اب جو پلٹ کے دیکھیے بات تھی کچھ محال بھی

میری طلب تھا ایک شخص وہ جو نہیں ملا تو پھر

ہاتھ دعا سے یوں گرا بھول گیا سوال بھی

اس کی سخن طرازیاں میرے لیے بھی ڈھال تھیں

اس کی ہنسی میں چھپ گیا اپنے غموں کا حال بھی

گاہ قریب شاہ رگ گاہ بعید وہم و خواب

اس کی رفاقتوں میں رات ہجر بھی تھا وصال بھی

اس کے ہی بازوؤں میں اور اس کو ہی سوچتے رہے

جسم کی خواہشوں پہ تھے روح کے اور جال بھی

شام کی نا سمجھ ہوا پوچھ رہی ہے اک پتا

موج ہوائے کوئے یار کچھ تو مرا خیال بھی 

              *********************

گئے موسم میں جو کھلتے تھے گلابوں کی طرح

دل پہ اتریں گے وہی خواب عذابوں کی طرح

راکھ کے ڈھیر پہ اب رات بسر کرنی ہے

جل چکے ہیں مرے خیمے مرے خوابوں کی طرح

ساعت دید کہ عارض ہیں گلابی اب تک

اولیں لمحوں کے گلنار حجابوں کی طرح

وہ سمندر ہے تو پھر روح کو شاداب کرے

تشنگی کیوں مجھے دیتا ہے سرابوں کی طرح

غیر ممکن ہے ترے گھر کے گلابوں کا شمار

میرے رستے ہوئے زخموں کے حسابوں کی طرح

یاد تو ہوں گی وہ باتیں تجھے اب بھی لیکن

شیلف میں رکھی ہوئی بند کتابوں کی طرح

کون جانے کہ نئے سال میں تو کس کو پڑھے

تیرا معیار بدلتا ہے نصابوں کی طرح

شوخ ہو جاتی ہے اب بھی تری آنکھوں کی چمک

گاہے گاہے ترے دلچسپ جوابوں کی طرح

ہجر کی شب مری تنہائی پہ دستک دے گی

تیری خوش بو مرے کھوئے ہوئے خوابوں کی طرح 

          

            *******************

    ہم نے ہی لوٹنے کا ارادہ نہیں کیا

اس نے بھی بھول جانے کا وعدہ نہیں کیا

دکھ اوڑھتے نہیں کبھی جشن طرب میں ہم

ملبوس دل کو تن کا لبادہ نہیں کیا

جو غم ملا ہے بوجھ اٹھایا ہے اس کا خود

سر زیر بار ساغر و بادہ نہیں کیا

کار جہاں ہمیں بھی بہت تھے سفر کی شام

اس نے بھی التفات زیادہ نہیں کیا

آمد پہ تیری عطر و چراغ و سبو نہ ہوں

اتنا بھی بود و باش کو سادہ نہیں کیا 

                  ****************

          

      غزل

                     

                       وفا ناہید خیال آثر

محبت دل اگر ہوتی ہے تو پتھر دل بھی ہوتی ہے 

کہیں مقتول ہوتی ہے کہیں قاتل بھی ہوتی ہے 

کہیں یہ بادشاہ وقت کے ہے تاج کی زینت 

کہیں پر حثییت اس کی سم قاتل بھی ہوتی ہے 

اگر وہ  روٹھ جائے تو ہمارا دم نکلتا ہے 

اسی کی مسکراہٹ زیست کا حاصل بھی ہوتی ہے

کھٹکتی ہے کبھی سادہ مزاجی اپنی دنیا کو 

کبھی یہ سادگی مثل مہ کامل بھی ہوتی ہے 

خرد کے پاؤں تھک جائیں تو خیمہ گاڑ دیتا ہے 

جنون عشق کیا تیری کوئی منزل  بھی ہوتی ہے 

وہ جب نزدیک ہوتے ہیں مسرت رقص کرتی ہے 

جدائی ان  کی رقص طائر بسمل بھی ہوتی ہے 

              چلے تھے جب وفا کا راستہ آسان لگتا تھا     

 پتہ یہ اب چلا راہ وفا مشکل بھی ہوتی ہے    

                  

            *****************

                       غزل  

   

        انصاری ظاہرہ فرید احمد

موسم تھا خوشگوار اور منظر بھی دلنشیں

لیکن ہمارے درد کا مرہم کوءی نہیں

غلطی کا پتلا لغزشیں انساں کی بےشمار

حیرت ہے ان گناہوں پہ نادم کوئی نہیں

ڈاکو, لٹیرے، چور ملیں گے یہاں بہت

گر چہ ہمارے شہر میں حاتم کوئی نہیں

فرقے، زباں،مذاہب و تہذیب سب الگ

باغی بہت ہیں ملک میں باہم کوئی نہیں

اے سحر تم‌سنبھل کے رہو اس جہان میں

یاں عیب جو کثیر ہیں مصلح کوئی نہیں

پتہ :گلزار نگر،بھیونڈی،مہاراشٹر 

(بی۔ایس۔سی،ایم۔اے،بی ایڈ)