مہاراشٹر حکومت کے 6 ایم ایل اے ڈرگس مافیا سے رشوت لیتے ہیں : سنجے راؤت
ممبئی: شیو سینا ادھو گروپ کے راجیہ سبھا ممبر پارلیمنٹ سنجے راؤت نے مہاراشٹر میں بڑے ڈرگ مافیا للت پاٹل کی گرفتاری اور اس کے سیاسی رابطوں کے خلاف سنگین الزامات لگائے ہیں۔ راؤت نے الزام لگایا کہ ایم ایل اے اور وزراء رشوت لیتے ہیں۔ انہوں نے کہا، 'ایک ایم ایل اے ڈرگ مافیا سے 16 لاکھ روپے ہفتہ لیتا ہے اور ایسے چھ ایم ایل اے ہیں۔ منشیات کیس میں گرفتار للت پاٹل صرف ایک پیادہ ہے، درحقیقت ڈرگ مافیا کے دوست اسمبلی میں بیٹھے ہیں۔ راؤت مہاراشٹر میں منشیات کی بڑھتی ہوئی لعنت کے خلاف احتجاج کے لیے ناسک میں مارچ میں شامل ہونے سے پہلے نامہ نگاروں سے بات کر رہے تھے۔ سنجے راؤت نے مہاراشٹر میں پھیلے ڈرگ مافیا کو لے کر ریاست کے وزیر داخلہ اور نائب وزیر اعلی دیویندر فڈنویس کو نشانہ بنایا۔ انہوں نے کہا، 'فڑنویس اپوزیشن کے بارے میں سب کچھ جانتے ہیں۔ وہ ڈرگ مافیا کے بارے میں کیسے نہیں جانتے۔ وہ مافیا اور ان لوگوں کو بچا رہے ہیں۔ یہ مہاراشٹر کی حالت زار ہے کہ ہمارے پاس ایسا وزیر داخلہ (فڈنویس) ہے۔
راؤت نے کہا کہ ہم نے ناسک میں مورچہ کا انعقاد منشیات کے استعمال سے ہونے والے نقصانات کے بارے میں بیداری پھیلانے کے لیے کیا ہے، لیکن طلبہ اور والدین کو اس میں حصہ لینے سے روکنے کی ہر ممکن کوشش کی گئی۔ ادھو گروپ شیوسینا کے ترجمان سنجے راؤت نے کہا، 'ہم نے طلباء اور والدین سے اس مورچے میں شامل ہونے کی اپیل کی تھی۔ تاہم، ایجوکیشن آفیسر نے طلباء سے مورچہ میں شامل نہ ہونے کے احکامات جاری کئے۔ کیا محکمۂ تعلیم منشیات کی حمایت کرتا ہے'
بتا دیں کہ ساکی ناکہ پولیس نے 6 اکتوبر کو کہا تھا کہ انہوں نے دو ماہ کے طویل آپریشن کے دوران 300 کروڑ روپے مالیت کا 151 کلو گرام میفیڈرون ضبط کیا ہے اور اس معاملے میں مختلف شہروں سے کئی افراد کو گرفتار کیا ہے۔ تحقیقات کے دوران ناسک میں واقع ایک منشیات بنانے والی یونٹ کا بھی پردہ فاش کیا گیا۔ پولیس کے مطابق للت پاٹل (37) اس گینگ کا سرغنہ ہے۔ پاٹل 2 اکتوبر کو پونے کے سسون جنرل اسپتال سے فرار ہوگیا تھا۔ بعد میں اسے منگل کی رات بنگلور کے قریب سے گرفتار کیا گیا۔
کوئی تبصرے نہیں:
ایک تبصرہ شائع کریں